នាយករដ្ឋមន្រ្តីម៉ាឡេស៊ីលោក Muhyiddin Yassin នឹងបន្តធ្វើជានាយករដ្ឋមន្រ្តីបណ្តោះអាសន្ន បើទោះបីជាលោកបានផ្ញើដំណឹងនៃការលាលែងពីតំណែងរបស់លោក ទៅកាន់ព្រះមហាក្សត្រក៏ដោយ នេះបើតាមការចុះផ្សាយរបស់សារព័ត៌មាន រ៉យទ័រ នៅមុននេះបន្ដិច។ គួរឱ្យដឹងដែរថា ការលាលែងពីតំណែងរបស់លោក Muhyiddin គឺដោយសារតែលោកមិនអាចរក្សាបានសំឡេងភាគច្រើននៅក្នុងសភា ខណៈដែលក្នុងរយៈពេល ១៧ ខែ នៃការកាន់តំណែងរបស់លោក គឺពោរពេញទៅដោយភាពចម្រូងចម្រាស។

ព្រះបរមរាជវាំងបាននិយាយថា ការបោះឆ្នោតមិនមែនជាជម្រើសល្អបំផុតនោះទេក្នុងពេលនេះ ហើយស្តេចស៊ុលតង់ Abdullah សព្វព្រះរាជហឫទ័យឱ្យលោក Muhyiddin បន្តថែរក្សារដ្ឋាភិបាលបច្ចុប្បន្ន។ សេចក្តីថ្លែងការណ៍មួយនៅលើហ្វេសប៊ុកបាននិយាយថា៖«ព្រះមហាក្សត្របានទទួលលិខិតលាលែងពីតំណែងរបស់លោក Muhyiddin Yassin និងគណៈរដ្ឋមន្ត្រីទាំងមូល» «បន្ទាប់ពីការលាលែងពីតំណែងនេះ ព្រះមហាក្សត្រសព្វព្រះទ័យឱ្យលោក Muhyiddin បំពេញតួនាទីជានាយករដ្ឋមន្រ្តីបណ្ដោះអាសន្ន រហូតដល់នាយករដ្ឋមន្ត្រីថ្មីត្រូវបានតែងតាំង»៕

អត្ថបទ៖ លីដា
ប្រភព៖ រ៉យទ័រ