យោងតាមការចុះផ្សាយរបស់សារព័ត៌មាន Daily Mail បានឱ្យដឹងថា មហាសេដ្ឋីលោក Jeff Bezos និងលោក Yuri Milner បានផ្តល់មូលនិធិដល់ក្រុមហ៊ុនជីវបច្ចេកវិទ្យាទើបតែបង្កើតឡើងមួយ ដែលមានគោលបំណងធ្វើការស្រាវជ្រាវអាចឱ្យមនុស្សអាចរស់នៅបានជារៀងរហូត។ មន្ទីរពិសោធន៍នោះមានឈ្មោះថា Altos បានចូលទៅក្នុងទីផ្សារសហរដ្ឋអាមេរិក និងចក្រភពអង់គ្លេសកាលពីដើមឆ្នាំនេះ ហើយបានរៃអង្គាសប្រាក់យ៉ាងតិច ២៧០ លានដុល្លារ ចំពោះសក្តានុពលនៃបច្ចេកវិទ្យាត្រឡប់កោសិកាមិនឱ្យចាស់ ខណៈដែលកន្លងមកខ្លួនក៏ទទួលបានលទ្ធផលជោគជ័យ ជាមួយនឹងការធ្វើតេស្ដលើសត្វរួចមកហើយ។

ពួកគេក៏បានលើកឡើងពីការស្រាវជ្រាវរបស់លោកបណ្ឌិតជប៉ុន Shinya Yamanaka ដែលជាអ្នកត្រួសត្រាយផ្លូវនៅក្នុងការស្រាវជ្រាវមួយទាក់ទងនឹងកោសិកា និងធ្លាប់ទទួលបានពាន់រង្វាន់ Nobel កាលពីឆ្នាំ២០១២ ពីការស្រាវជ្រាវនោះផងដែរ។ លោកបានរកឃើញថា ប្រសិនបើយើងបញ្ចូលប្រូតេអ៊ីនជាក់លាក់ចំនួន ៤ប្រភេទ ចូលទៅក្នុងកោសិកាណាមួយនោះ វានឹងត្រឡប់កោសិកាទៅរកសភាពដើមវិញ ជាមួយនឹងលក្ខណៈកោសិកាអំប្រ៊ីយ៉ុងដើមដែលបង្កើតជាប្លុកនៃជីវិតសត្វថ្មី។ លោកក៏នឹងក្លាយជាទីប្រឹក្សាដោយគ្មានប្រាក់ខែ ឱ្យក្រុមហ៊ុន Altos នេះបើតាមការចុះផ្សាយរបស់ MIT Technology Review ។

ជាមួយគ្នានេះដែរលោកបណ្ឌិត Juan Carlos Izpisua Belmonte ដែលជាអ្នកជីវវិទូជនជាតិអេស្ប៉ាញ ធ្វើការនៅវិទ្យាស្ថាន Salk ក្នុងរដ្ឋ California សហរដ្ឋអាមេរិក ក៏នឹងធ្វើការជាមួយក្រុមហ៊ុន Altos នេះផងដែរ។ លោកបណ្ឌិត Juan Carlos Izpisua Belmonte ធ្លាប់បានពិសោធន៍លើការសាកល្បងរបស់លោកបណ្ឌិត Shinya Yamanaka កាលពីឆ្នាំ២០១៦ ផងដែរ ដោយគាត់បានប្រើប្រាស់បច្ចេកទេសនោះទៅលើសត្វកណ្ដុរ ហើយជាលទ្ធផលគាត់បានរកឃើញថា វាពិតជាមានសញ្ញានេះការត្រឡប់កោសិកាមិនឱ្យចាស់ទៅតាមអាយុពិតមែន៕

អត្ថបទ៖ លីដា
ប្រភព៖ Daily Mail