ហង្សក្រហម Liverpool ត្រូវបើកទ្វារកីឡដ្ឋានស្វាគមន៍ក្លឹបតោខៀវ Chelsea នៅវេលាម៉ោង ១:៤៥ រំលងអាធ្រាត្រក្នុងក្របខ័ណ្ឌ Carabao Cup នៅជុំទី៣មុនពេលដែលក្លឹបទាំងពីរនឹងត្រូវប៉ះគ្នាម្តងទៀតនៅទឹកដី Stamford Bridge ក្នុងក្របខ័ណ្ឌ Premier League វិញម្តង។

Klopp បានបញ្ជាក់ថា Simon Mignolet នឹងចូលលេងក្នុងជម្រើស ១១នាក់ដំបូងពេលប៉ះនឹង Chelsea នៅយប់នេះខណៈដែល Dejan Lovren ហាក់ដូចជាត្រៀមខ្លួនរួចរាល់ក្នុងការចូលលេងវិញបន្ទាប់ពីរបួស។ Divock Origi មានបញ្ហា (កជើង) និង Adam Lallana (ក្រលៀន) កំពុងតែហ្វឹកហាត់ប៉ុន្តែប្រហែលជាមិនទាន់ត្រៀមខ្លួននៅឡើយទេ។

ខ្សែការពារ Antonio Rudiger មានបញ្ហា (ក្រលៀន) និងខ្សែបម្រើ Pedro (ស្មា)។ យើងនឹងដឹងថាតើកីឡាករ Willy Caballero នឹងចាប់ផ្តើមជម្រើសដំបូងរបស់គាត់នៅរដូវកាលនេះឬយ៉ាងណា។រីឯ Jorginho អាចត្រូវបានឲសម្រាកប៉ុន្តែមិនទាន់ដឹងច្បាស់នោះទេ។

Chelsea បានជួបហង្សក្រហម Liverpool ចំនួនប្រាំមួយដងក្នុងក្របខ័ណ្ឌ Carabao Cup ហើយអ្នកដែលឈ្នះនោះបានទៅកាន់វគ្គផ្តាច់ព្រ័ត្រ។ ជំនួបចុងក្រោយនៅឆ្នាំ 2015 បានបញ្ចប់ក្នុងលទ្ធផល 1-1 នៅលើទឹកដី Anfield ប៉ុន្តែក្លឹប Chelsea បានយកឈ្នះក្នុងលទ្ធផល 1-0 នៅឯទឹកដី Stamford Birdge ក្នុងការប្រកួតជើងទី២។

អត្ថបទ៖ ប៊ុនហួរ