សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចូលបច្ច័យ ២០លានរៀល និងចូលរួមរំលែកទុក្ខសពកុមារទាំងពីរនាក់បងប្អូន ដែលត្រូវគេរំលោភហើយសម្លាប់យ៉ាងអាណោចអាធ័ម
កំពង់ឆ្នាំង៖ នៅថ្ងៃសុក្រទី ១៩ ខែតុលា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីក្រោមឱវាទចូលរួមរំលែកទុក្ខដ៏ក្រៀមក្រំបំផុត ព្រមទាំងបាននាំយកគ្រឿងបរិភោគ និងបច្ច័យចំនួន ២០លានរៀល ចូលបុណ្យសពកុមារទាំងពីរនាក់បងប្អូន ដែលត្រូវបានគេរំលោភហើយសម្លាប់យ៉ាងអាណោចអាធ័មក្នុងខ្ទម ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង ខណៈដែល ឪពុកទៅធ្វើការនៅប្រទេសថៃ រីឯម្តាយទៅធ្វើការនៅភ្នំពេញទុកកូនផ្ញើសាច់ញាតិក្នុងភូមិ។
ក្នុងនោះផងដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏សូមសម្តែងនូវការសោកស្តាយជាពន់ពេក និងសូមចូលរួមរំលែកទុក្ខដ៏ក្រៀមក្រំបំផុតនេះ។ មិនត្រឹមតែប៉ុណ្ណោះ សម្ដេចកិត្តិព្រឹទ្ធបណ្ឌិត សូមអំពាវនាវដល់សមត្ថកិច្ចជំនាញវែកមុខរកឧក្រិដ្ឋជន ដើម្បីយកមកផ្ដន្ទាទោសតាមផ្លូវច្បាប់។ ដោយឡែក សម្រាប់អនុសាខាកាកបាទក្រហមកម្ពុជា ស្រុកបរិបូណ៌ និងសាខាកាកបាទក្រហមកម្ពុជា ខេត្តកំពង់ឆ្នាំង ក៏បានចូលរួមរំលែកទុក្ខ និងចូលបុណ្យសពកុមារីទាំងពីរនាក់នេះផងដែរ៕
ប្រភព៖ កាកបាទក្រហមកម្ពុជា