មេដឹកនាំបក្សប្រឆាំងរបស់ប្រទេសអូស្ត្រាលី ត្រូវបានប៉ូលីសធ្វើការផាកពិន័យជាចង្កោម ដោយសារក្រុមរបស់គាត់មិនបានពាក់ម៉ាស់តាមការណែនាំ
លោក Matthew Guy មេដឹកនាំបក្សប្រឆាំងនៅរដ្ឋ Victoria របស់ប្រទេសអូស្ត្រាលី ត្រូវបានប៉ូលីសនៅរដ្ឋ Victorian ធ្វើការផាកពិន័យចំពោះការមិនពាក់ម៉ាស់របស់គាត់ នៅពេលដែលគាត់ រួមជាមួយនឹងមេដឹកនាំមួយចំនួនដូចជា៖ សមាជិកសភាជាន់ខ្ពស់លោក Peter Walsh, David Davis និងសមាជិកសភាលោកស្រី Melina Bath និងលោក Gary Blackwood មិនបានពាក់ម៉ាស់នោះទេកាលពីថ្ងៃអង្គារសប្តាហ៍មុន។ សមាជិកសភា ៤ នាក់ផ្សេងទៀត ក៏ត្រូវបានគេចោទប្រកាន់ផងដែរ។ ពួកគេទាំងអស់គ្នាបានចូលរួមសុន្ទរកថាមួយ ដែលត្រូវផ្ញើទៅកាន់ពិធីជប់លៀងរបស់អតីតតារាក្នុងលីគ AFL និងបានប្រែក្លាយគ្រូបង្វឹកក្លឹប Essendon គឺលោក Kevin Sheedy ។
កាលពីមុនលោក Matthew Guy ក៏បានហៅច្បាប់ពាក់ម៉ាស់ក្នុងផ្ទះថាជាច្បាប់ច្របូកច្របល់ ហើយនៅក្នុងសេចក្តីថ្លែងការណ៍មួយនាពេលថ្មីៗនេះ លោកបាននិយាយថា បក្សសេរីនិយម និងដៃគូសម្ព័ន្ធរបស់ខ្លួន នឹងបន្តតស៊ូមតិសម្រាប់ការទាមទារឱ្យមានការដកច្បាប់ពាក់ម៉ាស់ នៅក្នុងតំបន់មានហានិភ័យទាប។ លោកថា ការធ្វើដូច្នេះនឹងជួយរដ្ឋក្នុងការ «ស្តារ កសាងឡើងវិញ និងឈានទៅមុខ»។ គួរឱ្យដឹងដែរថា អូស្ដ្រាលីនៅតែទាមទារឱ្យមានការពាក់ម៉ាស់នៅក្នុងទីតាំងបិទជិត សម្រាប់មនុស្សដែលមានអាយុចាប់ពី ៨ឆ្នាំឡើង ក្រោមច្បាប់នៃជំងឺ COVID-19 របស់រដ្ឋ Victoria ដោយមានការលើកលែងមួយចំនួន ដូចជានៅក្នុងផ្ទះឯកជនជាដើម។ ប៉ូលិសរដ្ឋ Victoria បានបញ្ជាក់ថា សមាជិកសភាទាំងនោះនឹងត្រូវផាកពិន័យ ១០០ ដុល្លារនៅប៉ុន្មានថ្ងៃខាងមុខ៕
អត្ថបទ៖ លីដា
ប្រភព៖ Ladbible