ប្រធានាធិបតីអាមេរិក ចូ បៃដិន បានប្រកាសហាមប្រាមការនាំចូលថាមពលពីរុស្ស៊ី ខណៈការ​សម្រេច​ចិត្ត​នេះ ​ធ្វើ​ឡើង​ស្រប​ពេល​ដែល​សហរដ្ឋ​អាមេរិក និង​សម្ព័ន្ធមិត្ត​របស់​ខ្លួន​ កំពុងកំណត់​គោលដៅ​សេដ្ឋកិច្ច​រុស្ស៊ី ​ជុំវិញ​ការ​ឈ្លានពានលើ​អ៊ុយក្រែន។ លោក ចូ បៃដិន បានប្រកាសពីការហាមប្រាមនេះនៅសេតវិមានកាលពីថ្ងៃអង្គារ ដោយការហាមប្រាមនោះមានរួមបញ្ចូលទាំងប្រេង ធ្យូងថ្ម និងឧស្ម័នធម្មជាតិរាវ។ លោកបាននិយាយថា សហរដ្ឋអាមេរិកចង់រក្សាសម្ពាធកាន់តែខ្លាំងលើលោក ពូទីន និងការធ្វើសង្រ្គាមរបស់គាត់។ លោក​ បៃដិន បាន​និយាយ​ថា លោក​កំពុង​អនុវត្ត​បម្រាម​នេះ ដើម្បី​បង្ក​ការ​ឈឺចាប់​បន្ថែម​ទៀត​លើ​លោក ពូទីន ។

លោក ចូ បៃដិន ក៏បានទទួលស្គាល់ផងដែរថា ការហាមប្រាមថាមពលនឹងត្រូវប៉ះពាល់ដល់គ្រួសារ និងអាជីវកម្មអាមេរិក។ ជាក់ស្ដែងកាលពីឆ្នាំមុន ៨% នៃការនាំចូលប្រេង និងផលិតផលចម្រាញ់របស់សហរដ្ឋអាមេរិកបាន គឺបានមកពីប្រទេសរុស្ស៊ី។ ម្យ៉ាងទៀត អ្នកប្រើប្រាស់ថាមពលទាំងនោះ បានឃើញពីការកើនឡើងតម្លៃរួចស្រេចទៅហើយ នៅពេលដែលសេដ្ឋកិច្ចអាមេរិក ឬមិនថានៅបណ្ដាប្រទេសផ្សេងទៀត បានជាសះស្បើយពីជំងឺរាតត្បាត។

លោក បៃដិន បាននិយាយថា ចាប់តាំងពីលោក ពូទីន ចាប់ផ្តើមបង្កើតកម្លាំងយោធាមក ឧស្ម័ន ១លីត្រ នៅអាមេរិកបានកើនឡើង ៧៥សេន ដូច្នេះការហាមប្រាមនឹងធ្វើឱ្យវាកើនឡើងខ្ពស់ជាងនេះ។ គាត់បានសន្យាថា នឹងបញ្ចេញប្រេងចេញពីស្តុកបម្រុង ហើយនឹងធ្វើគ្រប់យ៉ាងតាមដែលអាច ដើម្បីគ្រប់គ្រងតម្លៃនេះ។ លោក​បាន​បន្ថែម​ថា ស្ថានភាព​បែបនេះ គួរ​តែ​ជំរុញ​ប្រជាជន​អាមេរិក​ឱ្យ​ពន្លឿន​ការ​ផ្លាស់​ប្តូរ​ទៅ​រកការប្រើប្រាស់​ថាមពល​ស្អាតវិញ។ លោក​និយាយ​ថា ប្រសិនបើ​រឿង​នោះ​កើត​ឡើង «​ពួក​អាក្រក់ដូច​លោក​ពូទីន​» នឹង​មិន​អាច​ប្រើ​ឥន្ធនៈ​ហ្វូស៊ីល​ជា «អាវុធ​បាន​ឡើយ»៕

អត្ថបទ៖ លីដា
ប្រភព៖ NHK