ក្មេងប្រុសអាយុ ១១ឆ្នាំម្នាក់ បានធ្វើដំណើរចម្ងាយ ៦០០ ម៉ាយ (៩៦៥ គីឡូម៉ែត្រ) ពីភាគអាគ្នេយ៍នៃប្រទេសអ៊ុយក្រែន ទៅកាន់ព្រំដែនប្រទេសស្លូវ៉ាគីដោយខ្លួនឯង ដោយមានត្រឹមតែថង់ច្រកខោអាវ លិខិតឆ្លងដែន និងលេខទូរស័ព្ទ ដែលសរសេរនៅលើដៃរបស់គាត់ នេះបើតាមការចុះផ្សាយរបស់សារព័ត៌មាន Daily Mail។ មូលហេតុដែលគាត់ត្រូវធ្វើដំណើរផ្លូវឆ្ងាយម្នាក់ឯង គឺដោយសារម្តាយរបស់គាត់ជាប់គាំងនៅក្នុងក្រុង Zaporizhzhia, ជាកន្លែងដែលទាហានរុស្ស៊ីបានវាយយករោងចក្រថាមពលកាលពីសប្តាហ៍មុន។

ជាសំណាងល្អអ្នកស្ម័គ្រចិត្តនៅព្រំដែនអាចទាក់ទងទៅខាងគ្រួសាររបស់គាត់នៅឯប្រទេសស្លូវ៉ាគីបាន តាមរយៈលេខទូរស័ព្ទសរសេរនៅលើដៃរបស់គាត់ ដូច្នេះហើយគាត់មិនបានវង្វេងផ្លូវទៅណានោះទេ។ ក្មេងប្រុសម្នាក់នេះ បានទទួលនូវការកោតសរសើរពីមហាជន ជាមួយនឹងស្នាមញញឹម ភាពក្លាហាន និងការប្តេជ្ញាចិត្តទៅឱ្យដល់គោលដៅរបស់គាត់។

នៅក្នុងការបង្ហោះនៅលើទំព័រហ្វេសប៊ុកមួយបានសរសេរថា៖«អ្នកស្ម័គ្រចិត្តបានមើលថែគាត់ ផ្ដលចំណីអាហារ និងភេសជ្ជៈដល់គេ ដែលពួកគេបានវេចខ្ចប់អាហារសម្រាប់ការធ្វើដំណើរបន្ទាប់។ អរគុណចំពោះលេខទូរស័ព្ទនៅលើដៃរបស់គាត់ និងក្រដាសមួយសន្លឹកនៅចង្កេះរបស់គាត់ ក្មេងប្រុសនោះអាចទាក់ទងមនុស្សជាទីស្រលាញ់របស់គាត់ ដែលមករករូបគេនៅពេលក្រោយ ហើយរឿងទាំងមូលក៏បញ្ចប់ទៅដោយល្អ»។

របាយការណ៍ក្នុងស្រុកបានណែនាំថា ម្តាយរបស់ក្មេងប្រុសត្រូវស្នាក់នៅប្រទេសអ៊ុយក្រែន ដើម្បីមើលថែសាច់ញាតិដែលឈឺផ្សេងទៀត។ ប៉ុន្មានម៉ោងបន្ទាប់ពីក្មេងប្រុសបានទៅដល់កន្លែងសុវត្ថិភាព ម្តាយរបស់គាត់ឈ្មោញ Júlia Pisecká បានប្រាប់ថា កូនប្រុសរបស់គាត់អាចទៅដល់ព្រំដែនដោយរថភ្លើង នៅក្នុងវីដេអូមួយដែលត្រូវបានចែករំលែកនៅក្នុងហ្វេសប៊ុកដោយប៉ូលីសនៃសាធារណរដ្ឋស្លូវ៉ាគី។ ទន្ទឹមនឹងនេះដែរ បងប្អូនរបស់គាត់ផ្សេងទៀតក៏បានទៅដល់ប្រទេសស្លូវ៉ាគីដូចគ្នា៕

អត្ថបទ៖ លីដា
ប្រភព៖ Daily Mail