ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ជនស៊ីវិលយ៉ាងតិច ៥៤៩នាក់ រួមទាំងកុមារចំនួន ៤១ នាក់ បានស្លាប់នៅក្នុងការវាយប្រហារដោយប្រដាប់អាវុធ នៅក្នុងប្រទេសអ៊ុយក្រែនគិតត្រឹមថ្ងៃពុធ។ ការិយាល័យឧត្តមស្នងការទទួលបន្ទុកសិទ្ធិមនុស្ស ឬ OHCHR បានចេញសេចក្តីប្រកាសព័ត៌មានស្តីពីជនរងគ្រោះស៊ីវិលចុងក្រោយរបស់ខ្លួនកាលពីថ្ងៃព្រហស្បតិ៍ ដោយបាននិយាយថា ការស្លាប់ចំនួន ១២៣ ត្រូវបានបញ្ជាក់នៅក្នុងតំបន់ភាគខាងកើតនៃ Donetsk និង Luhansk ។ វាបាននិយាយថា ការស្លាប់ចំនួន ៤២៦ នាក់ ផ្សេងទៀតបានកើតឡើងនៅក្នុងរដ្ឋធានី Kyiv, ទីក្រុងធំទី២ Kharkiv, ទីក្រុងភាគខាងជើង Chernihiv, ទីក្រុង Kherson ភាគខាងត្បូង និងកន្លែងផ្សេងទៀត។

ទីភ្នាក់ងារជនភៀសខ្លួនរបស់អង្គការសហប្រជាជាតិបាននិយាយថា មនុស្សចំនួន ២.៣១ លាននាក់ បានភៀសខ្លួនពីប្រទេសអ៊ុយក្រែនទៅកាន់ប្រទេសផ្សេងទៀត នៅចន្លោះថ្ងៃទី២៤ ខែកុម្ភៈ ដល់ថ្ងៃពុធទី០៩ ខែមីនា។ UNHCR បាននិយាយថា ជាង ១.៤១ លាននាក់ ក្នុងចំណោមពួកគេ ឬប្រហែល ៦០% បានឆ្លងចូលទៅក្នុងប្រទេសប៉ូឡូញ។ ខ្លួនបាននិយាយថា មនុស្សជាង ២១០,០០០ នាក់ បានជម្លៀសទៅកាន់ប្រទេសហុងគ្រី ជាង ១៦០,០០០ នាក់ បានទៅប្រទេសស្លូវ៉ាគី ហើយជាង ៨០,០០០ នាក់បានឆ្លងចូលទៅក្នុងប្រទេសរ៉ូម៉ានី ខណៈជាង ៨០,០០០ នាក់ បានភៀសខ្លួនទៅកាន់ប្រទេសម៉ុលដាវី។ ទីភ្នាក់ងារនេះក៏បានបញ្ជាក់ផងដែរថា មានពលរដ្ឋជាង ៩០,០០០ នាក់ បានចូលប្រទេសរុស្ស៊ី៕

អត្ថបទ៖ លីដា
ប្រភព៖ NHK