អតីតប្រធានាធិបតីសហរដ្ឋអាមេរិកលោក បារ៉ា​ក់ ​អូ​បា​ម៉ា កាលពីថ្ងៃអាទិត្យ ទី១៣ ខែមីនា ឆ្នាំ២០២២ (ម៉ោងនៅអាមេរិក) បាននិយាយថា គាត់បានធ្វើតេស្តវិជ្ជមានចំពោះជំងឺ COVID-19 និងមានរោគសញ្ញាស្រាលប៉ុណ្ណោះ។ លោក អូបាម៉ា បានសរសេរនៅលើ Twitter របស់គាត់ ដោយបានបន្ថែមថា ភរិយារបស់លោក ដែលជាអតីតជំទាវទី១ គឺលោកស្រី មីសែល អូបាម៉ា មិនទាន់វិជ្ជមានជាមួយជំងឺ COVID-19 នោះទេ គិតមកទល់ពេលនេះ។ លោក អូបាម៉ា ក៏បានលើកឡើងពីផលប្រយោជន៍នៃការចាក់វ៉ាក់សាំងបង្ការ និងដូសជំរុញ ដែលអាចការពារលោកពីហានិភ័យធ្ងន់ធ្ងរ និងកាត់បន្ថយការឆ្លងចំពោះភរិយារបស់លោក។

លោក អូបាម៉ា ក៏បានរំលឹកឡើងវិញនូវការគាំទ្ររបស់គាត់ ចំពោះវ៉ាក់សាំងនៅក្នុងការបង្ហោះលើ Twitter របស់គាត់ កាលពីថ្ងៃអាទិត្យដោយនិយាយថា ការធ្វើតេស្តវិជ្ជមានរបស់គាត់គឺជា «ការរំលឹកមួយដើម្បីឱ្យគ្រប់គ្នាទៅទទួលការចាក់វ៉ាក់សាំង ប្រសិនបើអ្នកមិនទាន់បានចាក់ ទោះបីជាករណីធ្លាក់ចុះក៏ដោយ»។

គួរឱ្យដឹងដែរថា ទោះបីជាមានការប្រឆាំងលើការចាក់ថ្នាំបង្ការជំងឺ COVID-19 ក្នុងប្រទេសក៏ដោយ មជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) បាននិយាយថា ជាង ៨០% នៃមនុស្សទាំងអស់ ដែលមានអាយុចាប់ពី ៥ ឆ្នាំឡើងទៅ នៅក្នុងសហរដ្ឋអាមេរិក បានចាក់វ៉ាក់សាំងយ៉ាងហោចណាស់ ១ដូស ដែលជាសញ្ញាវិជ្ជមានមួយ នៅក្នុងការទប់ស្កាត់ការរីករាលដាលនៃជំងឺ COVID-19។ ករណីនៅសហរដ្ឋអាមេរិក ក៏បានធ្លាក់ចុះយ៉ាងខ្លាំងផងដែរ ដែលមានជាមធ្យមប្រហែល ៣៥,០០០ ករណីក្នុងមួយថ្ងៃ នៅពាក់កណ្តាលខែមីនានេះ បើប្រៀបធៀបទៅនឹងកម្រិតខ្ពស់បំផុតជាមធ្យម ដែលមាន ៨១០,០០០ ករណីក្នុងមួយថ្ងៃ នៅពាក់កណ្តាលខែមករា៕

អត្ថបទ៖ លីដា
ប្រភព៖ Channel News Asia