ទាហាន​រុស្ស៊ី​បាន​ចាប់​ផ្តើម​លុកលុយ​អ៊ុយក្រែន​កាល​ពី​មួយ​ខែ​មុន ប៉ុន្តែការរីកចម្រើនរបស់ពួកគេបានធ្លាក់ចុះ នៅពេលដែលពួកគេប្រឈមមុខនឹងការតស៊ូរបស់ពលរដ្ឋអ៊ុយក្រែន។ ឥឡូវនេះ ទាហាន​រុស្ស៊ី​អាចនឹងប្តូរទៅគោលដៅកំណត់បន្ថែមទៀត ខណៈបានបន្តឡោមព័ទ្ធទីក្រុង Mariupol ភាគអាគ្នេយ៍ ទោះបីជាកងទ័ពនៅក្នុងតំបន់ផ្សេងទៀតត្រូវបានដកថយក៏ដោយ។ លោក Sergei Rudskoy អនុប្រធានទី១ នៃអគ្គសេនាធិការយោធារុស្ស៊ី បាននិយាយថា ទោះបីជាមានការយឺតយ៉ាវក៏ដោយ ប៉ុន្តែការលុកលុយនឹងប្រព្រឹត្តទៅតាមផែនការ។ លោក Rudskoy បាននិយាយថា គោលបំណងសំខាន់នៃដំណាក់កាលដំបូងនៃប្រតិបត្តិការ គឺបានជោគជ័យ ហើយសក្ដានុពល​ប្រយុទ្ធ​របស់​កង​កម្លាំង​ប្រដាប់​អាវុធ​អ៊ុយក្រែន​ត្រូវ​បាន​កាត់​បន្ថយ​គួរ​ឱ្យ​កត់​សម្គាល់។

គាត់បាននិយាយថា ទាហានរបស់គាត់នឹងផ្តោតលើការសម្រេចបាននូវអ្វីដែលគាត់ហៅថា «គោលដៅសំខាន់» នោះគឺជាការរំដោះតំបន់ Donbass នៅភាគអាគ្នេយ៍។ មន្ត្រីការពារជាតិអាមេរិកដែលមិនបញ្ចេញឈ្មោះម្នាក់បាននិយាយថា កងកម្លាំងកំពុងព្យាយាមធ្វើឱ្យភាគខាងកើតអ៊ុយក្រែននៅដាច់ពីគេ ដើម្បីជាយុទ្ធសាស្ត្រចរចាដ៏មានសក្តានុពល។ មន្ត្រីរូបនេះបាននិយាយថា  ទាហានរុស្ស៊ីបានបញ្ឈប់ការខិតជិតរបស់ពួកគេទៅកាន់រដ្ឋធានី Kyiv ដោយសារមេបញ្ជាការរបស់ពួកគេ បានវាយតម្លៃលើសពីសមត្ថភាពរបស់ពួកគេក្នុងការដណ្តើមយកទីក្រុង Kyiv ។

ចំណែកប្រធានាធិបតីអ៊ុយក្រែនលោក Volodymyr Zelenskyy បាននិយាយថា មេបញ្ជាការរុស្ស៊ីមិនដឹងថា ពួកគេកំពុងធ្វើអ្វីនោះទេ។ គាត់​បាន​និយាយ​ថា វា​ជា​ថ្ងៃ​ទី៣០ នៃ​ការ​ឈ្លានពាន ហើយប្រសិន​បើ​រុស្ស៊ី​ដឹង​ពី​អ្វី​ដែល​អាចនឹងកើតឡើងនៅទីនេះ លោក​ប្រាកដ​ចិត្តថា រុស្ស៊ី​ខ្លាច​មិន​ហ៊ាន​មកនោះទេ។ លោក​បាន​និយាយ​ថា កងកម្លាំង​អ៊ុយក្រែន​បាន​ទប់​គ្រប់​ទិសដៅ​សំខាន់ៗ​នៃ​ការ​វាយ​ប្រហារ​របស់​រុស្ស៊ី។ លោក Zelenskyy ក៏បានបន្ថែមថា មេដឹកនាំពិភពលោកបាននិងកំពុងឆ្លើយតបជាមួយនឹងទណ្ឌកម្ម «បំផ្លិចបំផ្លាញ» ប្រឆាំងនឹងរុស្ស៊ី ដែលកំពុងធ្វើឱ្យរុស្ស៊ីខាតបង់យ៉ាងច្រើន៕

អត្ថបទ៖ លីដា
ប្រភព៖ NHK