ថៃ៖ ពិតជាគួរអោយកោតសរសើរមែន ក្មេងស្រីម្នាក់ឈ្មោះ Risa Vejsupaporn បេក្ខភាពកម្មវិធី Master chef junior Thailand ដែលធ្លាប់រងការរិះគន់យ៉ាងខ្លាំងពី «ក្រុមអ្នកលេងហ្វេសបុកដែលថែរាង» លើរឿងដែល Risa មានរូបរាងធាត់ តែបែរជាធ្វើនំប្រភេទ Keto លក់។ ក្មេងស្រីវ័យ ១៤ឆ្នាំរូបនេះ ត្រូវបានគេរិះគន់ និងសើចចំអកពាក់ព័ន្ធនឹងរូបរាងយ៉ាងខ្លាំង នៅលើបណ្ដាញសង្គម។

ក្រោយត្រូវគេរិះគន់ រយៈពេលពីរបីខែក្រោយមក Risa បានធ្វើបទសម្ភាសន៍ជាមួយនឹងកម្មវិធីមួយមានឈ្មោះថា « ផ្លូវសម្រាប់សេដ្ឋីអនឡាញ»។ ក្នុងបទសម្ភាសន៍ Risa បានប្រាប់ថា ឥលូវនេះមុខជំនួញការលក់នំ Keto របស់នាងគឺបានទទួលការគាំទ្រនិងជោគជ័យយ៉ាងខ្លាំង ដោយបច្ចុប្បន្ន Risa បានចុះបញ្ជីបើកជាក្រុមហ៊ុនរួចរាល់ហើយ ដោយមានឈ្មោះថា Risa F&B ចំកាត់ ដោយ Risa ជាម្ចាស់ហើយក៏ជា CEO ដោយផ្ទាល់ទៀតផង។

ជាមួយគ្នានេះម្ដាយរបស់ក្មេងស្រីដ៏ពូកែរូបនេះបានឱ្យដឹងផងដែរថា ២ឆ្នាំកន្លងមកនេះមុខជំនួញការលក់នំ Keto របស់កូនស្រីបានបង្កើតជាចំណូលរាប់លានបាត រឺរាប់មុឺនដុល្លា ទើបម្តាយសម្រេចចិត្តបើកជាក្រុមហ៊ុន និងចុះបញ្ជីអោយស្រប់ច្បាប់ ដើម្បីការពារបញ្ហាការបង់ពន្ធជូនរដ្ឋ ប៉ុន្តែដោយសារតែ Risa មានអាយុមិនទាន់គ្រប់ ១៥ឆ្នាំ ទើបនៅមិនទាន់មានសិទ្ធិគ្រប់គ្រងប្រតិបត្តិការហិរញ្ញវត្ថុបានទេ ដូច្នេះហើយទើបឱ្យកាន់តែភាគហ៊ុនធំសិន។ អ្នកម្តាយបានបន្ថែមទៀតថា បច្ចុប្បន្ន Risa កំពុងតែរៀបចំឯកសារត្រៀមហោះទៅបន្តការសិក្សាកម្រិតវិទ្យាល័យនៅសហរដ្ឋអាមេរិក ហើយគ្រោងនឹងពង្រីកសាខានៅទីនោះផងដែរ៕

អត្ថបទ៖ Bee
ប្រភព៖ sanook