មន្ត្រីអ៊ុយក្រែនបាននិយាយថា មនុស្សរាប់សិបនាក់បានស្លាប់ បូករួមទាំងកុមារចំនួន ៥នាក់ខណៈប្រហែល ១០០នាក់ បានរងរបួសកាលពីថ្ងៃសុក្រ នៅក្នុងការវាយប្រហារដោយគ្រាប់រ៉ុក្កែតរបស់រុស្ស៊ី ទៅលើស្ថានីយរថភ្លើង Kramatorsk ដែលជាស្ថានីយមួយក្នុងចំណោមស្ថានីយ៍ភាគខាងកើតបំផុត ដែលនៅតែដំណើរការនៅក្នុងប្រទេសអ៊ុយក្រែន។ ស្ថានីយនេះត្រូវបានគេប្រើប្រាស់ ដើម្បីជម្លៀសជនស៊ីវិលចេញពីតំបន់ Donbas ភាគខាងកើតអ៊ុយក្រែន។

អភិបាលក្រុង Kramatorsk បាននិយាយថា មនុស្សប្រហែល ៤,០០០ នាក់ ដែលភាគច្រើនជាស្ត្រី និងកុមារ បានស្ថិតនៅបរិវេណស្ថានីយ៍រថភ្លើង នៅពេលនៃការវាយប្រហារដោយរ៉ុក្កែតនោះ។ រូបភាពដែលបានចែករំលែកនៅលើប្រព័ន្ធផ្សព្វផ្សាយសង្គម ហាក់ដូចជាបង្ហាញពីជនរងគ្រោះជាច្រើននៅក្នុងសម្លៀកបំពាក់ស៊ីវិល។ ហើយបើយោងតាមសារព័ត៌មាន Associated Press បានឱ្យដឹងថា មនុស្សយ៉ាងហោចណាស់ ៥២ នាក់ ត្រូវបានសម្លាប់ក្នុងហេតុការណ៍នោះ៕

អត្ថបទ៖ លីដា
ប្រភព៖ CBS News