ក្រុមហ៊ុន Mercedes Benz របស់ប្រទេសថៃ បានប្រកាសកាលពីថ្ងៃច័ន្ទថា ខ្លួននឹងឈប់ប្រើប្រាស់ស្រីស្អាត ដែលស្លៀកពាក់សិចស៊ីបញ្ចេញសាច់ ឱ្យមកផ្សព្វផ្សាយរថយន្តរបស់ខ្លួននៅក្នុងកម្មវិធី Motor Show ទៀតហើយ នេះបើតាមការបង្ហោះដោយ KhaosodEnglish នៅលើបណ្ដាញសង្គមហ្វេសប៊ុក។ ដូច្នេះហើយ នារីម៉ូដែលស្អាតៗទាំងនោះ នឹងត្រូវបានជំនួសដោយមគ្គុទ្ទេស ដែលទទួលការបណ្តុះបណ្តាល និងស្គាល់ច្បាស់អំពីរថយន្ត ដោយមិនប្រកាន់ថាភេទណា ឬត្រូវចាំបាច់តែងខ្លួននោះឡើយ ហើយគេហៅអ្នកទាំងនោះថាជា មគ្គុទ្ទេសក៍ឌីជីថល (Digital Guides)។

ជាទូទៅវប្បធម៌នៃការប្រើប្រាស់នារីម៉ូដែលស្អាតៗ ដែលស្លៀកពាក់បញ្ចេញសាច់ ដើម្បីមកធ្វើបទបង្ហាញផ្សព្វផ្សាយរថយន្តនៅក្នុងព្រឹត្តិការណ៍នានា គឺជាយុទ្ធសាស្ត្រទីផ្សារដែលគេប្រើប្រាស់យ៉ាងទូលំទូលាយ។ ប្រការនេះ វាអាចប៉ះពាល់ដល់ទស្សនៈរបស់ប្រជាជនថៃចំពោះនារីម៉ូដែលទាំងនោះ ហើយវាប៉ះពាល់ដល់តម្លៃរបស់ស្ត្រី និងអាចនាំឱ្យមានសកម្មភាពមិនសមរម្យលើពួកគេផងដែរ។ ក្រុមហ៊ុនបាននិយាយថា ការសម្រេចចិត្តនេះគឺផ្អែកលើគោលដៅរបស់ក្រុមហ៊ុន Mercedes Benz នៅក្នុងការផ្លាស់ប្តូរតម្លៃស្ត្រីក្នុងសង្គមថៃ៕

អត្ថបទ៖ លីដា
ប្រភព៖ KhaosodEnglish, Auto Freestyle