អគ្គលេខាធិការអង្គការសហប្រជាជាតិ លោក Antonio Guterres បានកំពុងបន្តកិច្ចខិតខំប្រឹងប្រែងរបស់គាត់ ដើម្បីឈានទៅដល់ការបញ្ចប់ការសង្គ្រាមនៅអ៊ុយក្រែន។ លោក​បាន​ជួបជាមួយ​ប្រធានាធិបតី​រុស្ស៊ីលោក វ្ល៉ាឌីមៀ ពូទីន ជា​លើក​ដំបូង​ ចាប់​តាំង​ពី​ការ​ចាប់​ផ្តើម​ការ​លុកលុយរបស់រុស្ស៊ីលើអ៊ុយក្រែន។ រំលឹកដែរថា លោក Guterres បានរិះគន់រុស្ស៊ីចំពោះតួនាទីរបស់ខ្លួន ក្នុងការជំរុញឱ្យមានអំពើហិង្សា ហើយជំរុញឱ្យលោក ពូទីន មានសកម្មភាពបន្ថែមទៀត ដើម្បីជួយជនស៊ីវិលដែលជាប់នៅក្នុងការប្រយុទ្ធ ជាពិសេសអ្នកដែលជាប់នៅក្នុងទីក្រុង Mariupol ដែលត្រូវបានឡោមព័ទ្ធដោយទាហានរុស្ស៊ី។

មន្ត្រីរបស់អង្គការសហប្រជាជាតិបាននិយាយថា លោក ពូទីន បានយល់ព្រមចំពោះគំនិតនេះ «ជាគោលការណ៍» ហើយកិច្ចខិតខំប្រឹងប្រែងនេះ នឹងមានការចូលរួមពីអង្គការសហប្រជាជាតិ និងគណៈកម្មាធិការអន្តរជាតិសម្រាប់កាកបាទក្រហម។ លោក ពូទីន បាននិយាយថា លោកនៅតែស្វែងរកដំណោះស្រាយដោយសន្តិវិធី។ លោក​បាន​និយាយ​ថា ការ​ចរចា​កំពុង​ប្រព្រឹត្ត​ទៅ​ក្នុង​ទម្រង់​អនឡាញ ហើយ​សង្ឃឹម​ថា ពួកគេ​នឹង​នាំ​យើង​ទៅ​រក​លទ្ធផល​វិជ្ជមាន។

ទោះបីជាយ៉ាងណាក៏ដោយ លោកបានអះអាងថា ភាគីអ៊ុយក្រែនបានដើរថយក្រោយនៃកិច្ចព្រមព្រៀងមួយចំនួន ដែលបានធ្វើឡើងក្នុងអំឡុងពេលការចរចាកាលពីខែមុននៅក្នុងប្រទេសទួរគី។ មុននេះ លោក Guterres ក៏បានជួបជាមួយរដ្ឋមន្ត្រីការបរទេសរុស្ស៊ី លោក Sergei Lavrov ហើយបានអំពាវនាវឱ្យមានបទឈប់បាញ់។ លោក Guterres នឹងបន្ដដំណើរទៅរដ្ឋធានីកៀវ របស់អ៊ុយក្រែន សម្រាប់កិច្ចប្រជុំជាមួយប្រធានាធិបតី Volodymyr Zelenskyy នៅថ្ងៃព្រហស្បតិ៍៕

អត្ថបទ៖ លីដា
ប្រភព៖ NHK