អគ្គលេខាធិការអង្គការសហប្រជាជាតិ លោក Antonio Guterres បានទៅដល់រដ្ឋធានីកៀវ របស់ប្រទេសអ៊ុយក្រែន តាមរយៈប្រទេសប៉ូឡូញ ចេញពីប្រទេសរុស្ស៊ីកាលពីថ្ងៃពុធ។ គាត់គ្រោងនឹងជួបជាមួយប្រធានាធិបតីអ៊ុយក្រែន Volodymyr Zelenskyy និងរដ្ឋមន្ត្រីការបរទេស Dmytro Kuleba នៅថ្ងៃព្រហស្បតិ៍នេះ។ លោក Guterres និង Zelenskyy ត្រូវបានគេរំពឹងថា នឹងពិភាក្សាអំពីរបៀបធានាការជម្លៀសជនស៊ីវិលចេញពីទីក្រុង Mariupol ដែលត្រូវបានឡោមព័ទ្ធដោយយោធារុស្ស៊ី។

មុននេះលោក Guterres ក៏បានជួបជាមួយប្រធានាធិបតីរុស្ស៊ីលោក Vladimir Putin នៅទីក្រុងមូស្គូ។ ពួកគេបានយល់ព្រមលើការចូលរួមរបស់អង្គការសហប្រជាជាតិ ដើម្បីការជម្លៀសជនស៊ីវិលចេញពីទីក្រុង Mariupol ។ ពួកគេក៏បានយល់ព្រមធ្វើកិច្ចពិភាក្សាបន្តរវាងការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ ឬ OCHA និងក្រសួងការពារជាតិរុស្ស៊ី។ កាលពីថ្ងៃពុធ អ្នកនាំពាក្យអង្គការសហប្រជាជាតិបាននិយាយថា មន្ត្រី OCHA បានជួបពិភាក្សាជាមួយអាជ្ញាធររុស្ស៊ី និងអ៊ុយក្រែនលើបញ្ហានេះ៕

អត្ថបទ៖ លីដា
ប្រភព៖ NHK