កូនកំលោះនៅក្នុងប្រទេសចិនម្នាក់ ត្រូវបង្ខំចិត្តមើលពិធីអាពាហ៍ពិពាហ៍របស់គាត់តាមរយៈ Live Stream លើទូរស័ព្ទដៃរបស់គាត់ ដោយសារតែការចាត់វិធានការភ្លាមៗទាក់ទងនឹងជំងឺ COVID-19 នេះបើតាមការចុះផ្សាយដោយ Insider ។ នៅក្នុងវីដេអូមួយ ដែលបានចែកចាយនៅលើប្រព័ន្ធផ្សព្វផ្សាយសង្គម គេឃើញបុរសម្នាក់នៅក្នុងឈុតអាពាហ៍ពិពាហ៍របស់គាត់ បានអង្គុយញញឹមនៅលើខឿនផ្លូវ ខណៈកំពុងមើលកូនក្រមុំរបស់គាត់ដើរលើកម្រាលព្រំតាមរយៈ Live Stream ។ ចំណែកឯអ្នកដែលថតវីដេអូឱ្យគាត់ ក៏បាននិយាយបែបលេងសើចថា៖ «​ពិធី​មង្គលការ​បាន​ចាប់​ផ្ដើម​ហើយ ប៉ុន្តែ​កូន​កំលោះ​នៅ​ខាង​ក្រៅរោងការ»។

រឿងនេះ​បានទទួលភាពល្បីល្បាញពេញបណ្ដាញសង្គម​ចិន Weibo ​ជាមួយនឹង​ hashtag «កូន​កំលោះ​មិន​បាន​ធ្វើតេស្តរកជំងឺ COVID-19 ហើយ​ត្រូវមកអង្គុយ​នៅ​ខាង​ក្រៅ​រោងការ ដើម្បី​មើល ​Live Stream ​ពិធី​មង្គលការរបស់ខ្លួន» ហើយវីដេអូរបស់កូនកំលោះម្នាក់នោះ បានទទួល​​ការ​ចូល​មើល​ជាង ២១០ លាន​ដងឯណោះ។

កូន​កំលោះ​ម្នាក់នោះ ត្រូវបានគេស្គាល់ឈ្មោះថាលោក Deng រស់នៅ​តំបន់ Xinjiang ភាគពាយព្យនៃប្រទេសចិន ហើយគាត់បានពន្យល់ថា មូលហេតុដែលគាត់មិនអាចចូលរួមពិធីអាពាហ៍ពិពាហ៍របស់គាត់បាន គឺដោយសារសំបុត្របញ្ជាក់ពីការធ្វើតេស្ដ PCR រកមើលជំងឺ COVID-19 របស់គាត់បានហួសសុពលភាព ហើយគាត់ត្រូវទៅធ្វើតេស្ដម្ដងទៀត ដើម្បីអាចចូលរួមពិធី​មង្គលការរបស់ខ្លួនបាន។ លោក Deng បាននិយាយថា ដំបូងឡើយការតេស្ដ PCR របស់គាត់ អាចមានសុពលភាពក្នុងរយៈពេល ៤ថ្ងៃ នៅមុនថ្ងៃមង្គលការរបស់គាត់ ប៉ុន្តែដោយសារការផ្លាស់ប្ដូរវិធានការភ្លាមៗ បានធ្វើឱ្យសុពលភាពការធ្វើតេស្ដត្រូវបន្ថយនៅត្រឹម ៤៨ ម៉ោងវិញ។

ដូច្នេះគាត់ត្រូវប្រញាប់ទៅគ្លីនីកដែលនៅជិតបំផុត ដើម្បីធ្វើតេស្ដមួយផ្សេងទៀត ដែលធ្វើឱ្យគាត់ត្រូវខកខាន មិនអាចចូលទៅក្នុងអគារពិធីរបស់គាត់បាន ហើយមានភ្ញៀវរបស់គាត់ប្រមាណជា ២០នាក់ ក៏ត្រូវជាប់គាំងដូចគ្នា។ យ៉ាងណាក៏ដោយ ទីបំផុតគាត់អាចចូលទៅក្នុងអាគារបាន នៅម៉ោង ៤ និង ៤៣ នាទីល្ងាច ខណៈដែលពិធីត្រូវចាប់ផ្តើម​តាំងតែពីម៉ោង ​២​ រសៀលម្ល៉េះ ហើយគូស្នេហ៍​ទាំង ២ ក៏បាន​រៀបការ​ជាមួយគ្នានៅ​ម៉ោង ​៦​ល្ងាច ៕

អត្ថបទ៖ លីដា
ប្រភព៖ Insider