គេងមិនលក់មែនទេ? ៧ចំណុចនេះនឹងអាចកែប្រែទម្លាប់នេះចេញ!

យើងទាំងអស់គ្នាច្បាស់ជាធ្លាប់ឆ្លងកាត់រឿងនេះគ្រប់គ្នា ពេលខ្លះចូលគេងហើយភ្នែកបើកចំហរគេងមិនលក់ គិតនេះគិតនោះ ហើយពេលខ្លះជិតដល់ម៉ោងរោទ៍ពេលព្រឹកវិញក៏នៅមិនទាន់គេងលក់ទៀត។ លុះដល់ពេលព្រឹកឡើងងើបមិនចង់រួច អ្នកខ្លះព្យាយាមបិទភ្នែកដោយសង្ឃឹមថានឹងបានគេងបន្ថែម១០​ទៅ២០នាទីទៀត ឯអ្នកខ្លះទៀតអូសខ្លួនចេញពីគ្រែយ៉ាងស្ពឹកស្រពន់ដោយសារតែខ្លាចយឺតយ៉ាវការងារប្រចាំថ្ងៃរបស់គេ។ យ៉ាងណាមិញប្រសិនជាអ្នកជួបបញ្ហាទាំងនេះ ពួកយើងមានវិធីល្អ៧យ៉ាងដែលអាចផ្លាស់ប្តូរទម្លាប់អាក្រក់ និងការគេងមិនលក់នៅពេលយប់របស់អ្នកបាន។

១. ចាប់ផ្តើមថ្ងៃថ្មីរបស់អ្នកដោយងូតទឹកត្រជាក់៖ នេះអាចស្ដាប់ទៅដូចជាការធ្វើទារុណកម្មប៉ុន្តែវាពិតជាជួយដល់អ្នកបានច្រើន ទឹកផ្កាឈូកត្រជាក់ធ្វើឱ្យអ្នកដកដង្ហើមបានល្អដោយវាបង្កើនការទទួលយកអុកស៊ីហ៊្សែន។ ការទទួលបានអុកស៊ីសែនច្រើនគឺអាចបង្កើនលំហូរឈាម និងបង្កើនការប្រុងស្មារតី។ ការស្រាវជ្រាវក៏បង្ហាញផងដែរថាទឹកត្រជាក់អាចបន្ថយកម្រិតជាតិអាស៊ីតអ៊ុយរិចដែលអាចបន្ថយភាពតានតឹងរបស់អ្នកបាន។
​​

២. ទទួលទានអាហារពេលព្រឹកដែលមានជីវជាតិ៖ យើងជាច្រើនដឹងហើយថាអ្វីដែលយើងញ៉ាំសម្រាប់អាហារពេលព្រឹកគឺកំណត់អារម្មណ៍របស់យើងពេញមួយថ្ងៃ។ ដូច្នេះក្រោយពីការគេងមិនសូវលក់របស់អ្នក សូមចាប់ផ្ដើមថ្ងៃថ្មីរបស់អ្នកជាមួយអាហារពេលព្រឹកដែលមានជីវជាតិ។

៣. កុំផឹកកាហ្វេច្រើនពេក៖ មួយពែងនៃកាហ្វេនៅពេលព្រឹកអាចធ្វើឱ្យថ្ងៃថ្មីរបស់ល្អប្រសើរឡើង ប៉ុន្តែវាមិនមែនជាគំនិតល្អទេប្រសិនបើអ្នកផឹកកាហ្វេពេលដែលអ្នកមានជំងឺគេងមិនលក់។ រាងកាយរបស់យើងចំណាយពេលជាមធ្យម ៦ម៉ោងក្នុងការបន្សាបជាតិកាហ្វេអ៊ីនរបស់កាហ្វេ អីចឹងហើយបើអ្នកផឹកវាពេលល្ងាចនោះអ្នកនឹងពិបាកក្នុងការគេងឱ្យលក់ពេលយប់។

៤. ជៀសវាងការចុចប៊ូតុង «SNOOZE» លើម៉ោងរោទ៍៖ យើងទាំងអស់គ្នាចូលចិត្តងើបហើយចុចប៊ូតុង «SNOOZE»​ នេះហើយគេងទៅវិញ ដោយគិតថានឹងអាចគេងបានប៉ុន្មាននាទីថែមទៀត ប៉ុន្តែវិធីនេះនឹងមិនអាចប៉ះប៉ូវដំណេកដែលបាត់បង់នោះទេ ហើយវានឹងធ្វើឱ្យខូចទម្លាប់ពេលវេលាដែលអ្នកចូលគេងរៀងរាល់ថ្ងៃ និងគេងមិនលក់ពេលយប់ដដែល។

៥. ចេញទទួលពន្លឺព្រះអាទិត្យ៖​ ការចេញទទួលពន្លឺព្រះអាទិត្យនឹងជួយជម្រុញអារម្មណ៍របស់អ្នក ព្រោះវាធ្វើឱ្យមានការបញ្ចេញ Endorphin ដែលធ្វើអោយយើងមានអារម្មណ៍ល្អ។ ទម្លាប់ដើរក្រោមពន្លឺព្រះអាទិត្យពេលព្រឹក យ៉ាងតិច២០នាទីតាមដែលអាចធ្វើទៅបាន នោះពន្លឺពីព្រះអាទិត្យនឹងបញ្ឈប់ការបញ្ចេញអ័រម៉ូន melatonin ដែលនឹងធ្វើឱ្យអ្នកមានអារម្មណ៍ស្រឡះខ្លួនពេញមួយថ្ងៃ។

៦. ជៀសវាងការគេងថ្ងៃ៖ រក្សាការគេងថ្ងៃរបស់អ្នកឱ្យខ្លីចន្លោះពី១០ទៅ៣០នាទី ឬមិនបាច់គេងពេលថ្ងៃតែម្តងប្រសិនជាអ្នកមិនចងឱ្យគេងមិនលក់ពេលយប់ ព្រោះថាបើអ្នកគេងឆ្អែតពីពេលថ្ងៃអ្នកនឹងមិនងងុយពេលយប់នោះទេ។

៧. កុំចូលគេងលឿនជាធម្មតា៖ ជៀសវាងការចូលគេងលឿនជាងធម្មតា ទោះបីជាអ្នកងងុយដេកយ៉ាងណាក៏ដោយ។ ការគេងបានច្រើនម៉ោងនឹងមិនជួយឱ្យអ្នកបាត់ហត់នឿយនោះទេ តែវានឹងធ្វើឱ្យអ្នកភ្ញាក់ពីដេកមកមាន​អារម្មណ៍​ថា​អស់កម្លាំង។ ការគេងឱ្យងើបឡើងមាន​អារម្មណ៍ល្អមិនអស់កម្លាំងគឺត្រូវតែគេងឱ្យបាន ៨ម៉ោងតាមការណែនាំជាទូទៅ។

អត្ថបទ៖ លីដា
ប្រភព៖ care2