ប្រធានាធិបតីអ៊ុយក្រែនលោក Volodymyr Zelenskyy បានថ្កោលទោសយ៉ាងខ្លាំងចំពោះប្រទេសរុស្ស៊ី ដោយប្រៀបធៀបប្រទេសនេះទៅនឹងពួកណាស៊ីអាល្លឺម៉ង់។ លោក Zelenskyy បានចេញសារវីដេអូមួយកាលពីថ្ងៃអាទិត្យ ដោយបាននិយាយពីភាពសាហាវរបស់ពួកណាស៊ី នៅក្នុងប្រទេសរបស់គាត់ និងប្រទេសនៅតំបន់អឺរ៉ុបផ្សេងទៀត នៅចំថ្ងៃដែលអ៊ុយក្រែនរំលឹកដល់ការចុះចាញ់របស់ណាស៊ីអាល្លឺម៉ង់ នៅក្នុងសង្គ្រាមលោកលើកទី២។

លោក​ប្រធានាធិបតី​បាន​មាន​ប្រសាសន៍​ថា៖«រាប់​ទសវត្សរ៍​ក្រោយ​សង្គ្រាម​លោក​លើក​ទី២ ភាព​ងងឹត​បាន​ត្រឡប់​មក​អ៊ុយក្រែនជាថ្មី»។ លោក​បាន​បន្ត​ថា​៖ «វានៅ​ក្នុង​ឯកសណ្ឋាន​ផ្សេង​គ្នា ​ក្រោម​ពាក្យ​ស្លោក​ផ្សេង​ៗ​គ្នា ប៉ុន្តែ​ក្នុង​គោល​បំណង​ដូច​គ្នា​។ ការ​កសាង​ឡើងវិញ​នូវ​លទ្ធិ​ណាស៊ី​ ​ត្រូវ​បាន​រៀបចំ​ឡើង​ក្នុង​ប្រទេស​អ៊ុយក្រែនម្ដងទៀត»។ មេដឹកនាំអ៊ុយក្រែនរូបនេះបានសង្កត់ធ្ងន់ថា៖«ដូច្នេះយើងនឹងយកឈ្នះលើអ្វីគ្រប់យ៉ាង។ ហើយយើងដឹងច្បាស់អំពីរឿងនេះ ពីព្រោះយោធារបស់យើង និងប្រជាជនរបស់យើងទាំងអស់ គឺជាកូនចៅរបស់អ្នកដែលបានយកឈ្នះលើលទ្ធិណាស៊ី។ ដូច្នេះពួកគេនឹងឈ្នះម្តងទៀត»៕

អត្ថបទ៖ លីដា
ប្រភព៖ NHK