យោងតាមការចុះផ្សាយរបស់សារព័ត៌មាន រ៉យទ័រ នៅ​ថ្ងៃ​អង្គារ ទី១០ ខែមេសា ឆ្នាំ២០២២ បានឱ្យដឹងថា លោក Ferdinand Marcos Jr ដែលមាននាមហៅក្រៅថា «Bongbong» និងមានឪពុក​ជាមេដឹកនាំហ្វីលីពីនផ្តាច់ការ​ ​លួច​ប្លន់​ និង​ធ្វើ​បាប​ពលរដ្ឋ​អស់​ជាច្រើន​ទសវត្សរ៍​មក​ហើយ​នោះ​ ពេលនេះបាន​ទទួល​ជ័យ​ជម្នះ​ និងឈ្នះបានសំឡេងភាគច្រើន (២៧.៥ លានសំឡេង) នៅក្នុង​ការ​បោះឆ្នោត​ជា​ប្រវត្តិសាស្ត្រ​មួយ ដែលនាំឱ្យត្រកូល Marcos អាចត្រឡប់មកដឹកនាំប្រទេសនេះឡើងវិញ។

ក្នុងរយៈពេល ៣៦ឆ្នាំ ចាប់តាំងពីការបះបោរដ៏ធំមួយមួយប្រឆាំងនឹងឪពុករបស់គាត់គឺលោក Ferdinand Marcos និងបានធ្វើឱ្យក្រុមគ្រួសារ Marcos ត្រូវនិរទេសទៅសហរដ្ឋអាមេរិកមក គ្រួសារមួយនេះបាននិងកំពុងកសាងស្នាដៃនយោបាយរបស់ពួកគេឡើងវិញ ហើយឥឡូវនេះ លោក Marcos Jr ក៏បានទទួលជោគជ័យពិតមែន បើទោះបីជាឪពុករបស់គាត់មានការព្រួយបារម្ភពីភាពខ្ជិល និងមិនខ្វល់ខ្វាយរបស់គាត់ក៏ដោយ។ នៅក្នុងយុទ្ធនាការរបស់គាត់ លោកបានប្តេជ្ញាថានឹងបង្រួបបង្រួមប្រទេសហ្វីលីពីន ជំរុញការងារ និងដោះស្រាយការកើនឡើងតម្លៃ ដែលជាផ្នែកនៃផ្លូវចេញពីវិបត្តិជំងឺរាតត្បាត៕

អត្ថបទ៖ លីដា
ប្រភព៖ រ៉យទ័រ