សភាតំណាងរាស្រ្តដឹកនាំដោយប្រជាធិបតេយ្យបានបោះឆ្នោត ៣៦៨ ទល់នឹង ៥៧ កាលពីល្ងាចថ្ងៃអង្គារ ដើម្បីអនុម័តវិក័យប័ត្រប្រហែល ៤០ ពាន់លានដុល្លារ ដើម្បីផ្តល់ជំនួយដល់អ៊ុយក្រែន ខណៈដែលអ៊ុយក្រែននៅតែបន្តប្រឈមមុខនឹងការវាយលុកដ៏ឃោរឃៅរបស់រុស្ស៊ី។ សន្លឹកឆ្នោតទាំង ៥៧ សំឡេង ដែលជំទាស់នោះ គឺចេញមកពីគណបក្សសាធារណរដ្ឋ។ វិធានការបន្ទាប់នឹងត្រូវអនុម័តដោយព្រឹទ្ធសភា មុនពេលវាអាចទៅដល់ប្រធានាធិបតី ចូ បៃដិន ដើម្បីចុះហត្ថលេខាលើច្បាប់នោះ។

មេដឹកនាំភាគច្រើននៃព្រឹទ្ធសភា គឺលោក Chuck Schumer បាននិយាយនៅព្រឹកថ្ងៃអង្គារនេះថា បន្ទាប់ពីសភាបានអនុម័តកញ្ចប់នេះ ព្រឹទ្ធសភា«នឹងធ្វើការឱ្យបានលឿនបំផុត» ដើម្បីឱ្យវិធានការនេះទទួលបានការយល់ព្រម ហើយត្រូវបានបញ្ជូនទៅតុរបស់លោក ចូ បៃដិន។

ជំនួយដល់អ៊ុយក្រែន គឺជាចំណុចដែលអាចប្ដូរភាពតានតឹងនៅវិមាន Capitol Hill រវាងគណបក្សប្រជាធិបតេយ្យ និងគណបក្សសាធារណរដ្ឋ នៅពេលដែលពួកគេភាគច្រើនសុទ្ធតែអំពាវនាវឱ្យជួយប្រទេសអ៊ុក្រែន ខណៈដែលប្រទេសនេះកំពុងប្រឈមមុខនឹងការវាយប្រហាររបស់រុស្ស៊ី។ សមាជិកសភាបានបង្ហាញសេចក្តីព្រាងច្បាប់នេះ នៅមុនថ្ងៃបោះឆ្នោតសភា ហើយច្បាប់ដែលសភាបានអនុម័តផ្តល់មូលនិធិសម្រាប់បញ្ជីអាទិភាពជាច្រើន គឺមានរួមទាំងជំនួយផ្នែកយោធា និងមនុស្សធម៌៕

អត្ថបទ៖ លីដា
ប្រភព៖ CNN