អ្នកស៊ើបអង្កេតរបស់អង្គការសហប្រជាជាតិ នឹងពិនិត្យរកមើលឧក្រិដ្ឋកម្មសង្គ្រាមរបស់រុស្ស៊ីនៅប្រទេសអ៊ុយក្រែន

គណៈប្រតិភូនៃក្រុមប្រឹក្សាសិទ្ធិមនុស្សអង្គការសហប្រជាជាតិ បានអនុម័តសេចក្តីសម្រេចមួយនៅទីក្រុងហ្សឺណែវ កាលពីថ្ងៃព្រហស្បតិ៍ ដើម្បីបើកការស៊ើបអង្កេតលើឧក្រិដ្ឋកម្មសង្គ្រាមដោយទាហានរុស្ស៊ីនៅក្នុងប្រទេសអ៊ុយក្រែន។ បេសកជនមកពី ៣៣ ប្រទេស បានបោះឆ្នោតគាំទ្រគំនិតនេះ ខណៈបេសកជនមកពីប្រទេសចិន និងអេរីទ្រា បានបោះឆ្នោតប្រឆាំងនឹងដំណោះស្រាយនេះ ហើយបេសកជន​មក​ពី​ ១២​ប្រទេស​ បាន​ដកខ្លួនពីការបោះឆ្នោតនេះ។ ឯកអគ្គរដ្ឋទូតចិនលោក Chen Xu បាននិយាយថា ការសម្រេចចិត្តនេះនឹងបម្រើឱ្យភាពតានតឹងកើនឡើង។

មន្ត្រីអង្គការសហប្រជាជាតិ បានបញ្ជាក់ថា ជនជាតិអ៊ុយក្រែនជាង ៣,០០០ នាក់ ត្រូវបានសម្លាប់ចាប់តាំងពីមានការឈ្លានពានពីរុស្ស៊ី ហើយគេសង្ស័យ​ថា​ចំនួន​ពិតអាចមាន​ច្រើន​ជាងនេះ។ កាល​ពី​ខែ​មុន សមាជិក​ក្រុម​ប្រឹក្សា​បាន​ដក​អាសនៈ​របស់​រុស្ស៊ី​ចេញ​ បន្ទាប់​ពី​បាន​ដឹង​ពី​ការ​សម្លាប់​ជន​ស៊ីវិល​នៅ​ក្រុង Bucha និង​កន្លែង​ផ្សេង​ទៀត។ ពួកគេបានអញ្ជើញឯកអគ្គរដ្ឋទូតរុស្ស៊ី Gennady Gatilov ឱ្យចូលរួមជាអ្នកសង្កេតការណ៍ ប៉ុន្តែគាត់មិនដែលបង្ហាញខ្លួនទេ។ ចំណែកលោក Gatilov បានចេញសេចក្តីថ្លែងការណ៍ចោទប្រកាន់ប្រទេសលោកខាងលិចថា បានរៀបចំ «ផ្លូវនយោបាយដើម្បីបង្ខូចកេរ្តិ៍ឈ្មោះរុស្ស៊ី»៕

អត្ថបទ៖ លីដា
ប្រភព៖ វ៉ាស៊ីនតោនប៉ុស្ដិ៍