នៅចាំបានទេ? ករណីកូនប្រុសលួចដកលុយម្ដាយពី ATM យកទៅបាចចែកអ្នកភូមិ ឥលូវម្ដាយសម្រេចដកពាក្យបណ្ដឹងហើយ តែដកមិនបានវិញ ទោះម្ដាយចង់ដកក៏ដោយ 

ថៃ៖ យោងតាមការចុះផ្សាយរបស់ Khaosod កាលពីថ្ងៃទី ១២ ឧសភា កន្លងមកជុំវិញករណីដែលបានកើតឡើង កាលពីថ្ងៃទី ០៧ ឧសភា ក្រោយកូនប្រុសដែលមានឈ្មោះថា Wuttisak អាយុ ៣៩ឆ្នាំ បានលួចដកលុយពីកាត ATM អ្នកម្តាយជាង ១មុឺនដុល្លារ ដើម្បីយកទៅបាចនិងទិញទំនិញចែកនៅផ្សារ។ ក្រោយមកម្តាយរបស់លោក Wuttisak បានទៅដាក់ពាក់បណ្តឹងដើម្បីទុកជាមេរៀនដល់កូនប្រុស ក៏ដូចជាចង់អោយតម្រួតជួយតាមប្រមូលលុយដែលមានអ្នករើសបានត្រឡប់មកវិញ ប៉ុន្តែចុងក្រោយម្តាយរបស់លោក Wuttisak ក៏បានលើកលែងទោសអោយកូនវិញ ក្រោយកូនប្រុសបានទិញឆ្នោតជាតិថៃជូនអ្នកម្តាយវិញក្រែងម្តាយត្រូវឆ្នោតបានរង្វាន់ទី១។

លុះមកដល់ថ្ងៃទី ១២ ឧសភា កន្លងមក លោកវរសេនីយ៍ឯក Wachirawit Wannathani អធិការនគរបាលក្រុង Satuk ស្រុក Satuk ខេត្ត Buriram បានឱ្យដឹងថា យោង​ទៅ​លើ​បណ្តឹង​ដែល​បាន​កើត​ឡើង ឥឡូវ​មាន​អ្នក​យក​លុយ​មក​វិញ​បណ្តើរៗ​ហើយ​ប្រហែល​៦​ពាន់​បាត រឺ ជាង២០០ដុល្លារ។ ចំណែកបទល្មើសដែលបានកើតឡើង គឺជាបទល្មើសព្រហ្មទណ្ឌ និងជាបទល្មើសដែលមិនអាចសម្រុះសម្រួលគ្នាដោយគ្មានការជំនុំជំរះពីសំណាក់តុលាការបានទេ។ ចំណុចដែលសំខាន់ទៀតនោះគឺ លោក Wuttisak គឺជាកូនចិញ្ចឹម ដែលមិនបានជាប់សាច់ឈាមពីកំណើតថែមទៀត​។ 

គួរបញ្ជាក់ផងដែរថា ដំបូងបទ​ចោទ​ប្រកាន់​លើ​លោក Wuttisak ត្រូវ​បាន​ចោទ​ប្រកាន់​ពី​បទ «លួច និង​លួច​កាត​អេឡិចត្រូនិក (កាតដកប្រាក់ដោយស្វ័យប្រវត្តិ ឬ ATM)។ ក្រោយពិនិត្យស្ថានភាពរស់នៅ អ្នកស្រី Somwang ដែលត្រូវជាម្តាយអាយុ៧០ឆ្នាំ គឺរស់នៅជាមួយកូនប្រុសតែ២នាក់ ហើយម្តាយក៏ប្តូរចិត្តលែងចង់ដាក់ពាក់បណ្តឹងកូនហើយ។

ដូច្នេះហើយ មន្ត្រីស៊ើបអង្កេតបានសរសេរនៅចុងបញ្ចប់នៃរបាយការណ៍បណ្តឹងថា “លោកស្រី Somwang មិនចង់ដាក់ពាក្យបណ្តឹងទៅលើកូនប្រុសទៀតទេ។ លើសពីនេះ លោកស្រី Somwang គ្មានអ្នកមើលថែ” ដើម្បីឱ្យតុលាការមេត្តា តាមឆន្ទានុសិទ្ធិរបស់តុលាការ៕

អត្ថបទ៖ Bee
ប្រភព៖ khaosod