យោងតាមប្រភពព័ត៌មានរបស់ Daily mail ដែលបានចុះផ្សាយកាលពីថ្ងៃទី១១ ឧសភា បានអោយដឹងថា មានករណីដ៏គួរអោយភ្ញាក់ផ្អើលមួយបានកើតឡើយ ដោយមានអ្នកដំណើរម្នាក់ស្ថិតនៅលើយន្តហោះ ដែលហោះចេញពីរដ្ឋ Bahamas ទៅកាន់រដ្ឋ Florida សហរដ្ឋអាមេរិក បានបើកយន្តហោះចុះចតដោយជោគជ័យកាលពីថ្ងៃទី ១០ ខែឧសភាកន្លងទៅ បើទោះជាមិនមានបទពិសោធន៍ក្នុងការបើកយន្តពីមុនមកក៏ដោយ ដោយសារតែពីឡុតបានដួលសន្លប់។ ទោះជាយ៉ាងណាការបើកបរយន្តហោះនេះអ្នកដំណើរមិនបានបើកបរតែម្នាក់ឯងឡើយ ប៉ុន្តែលោកទទួលបានការណែនាំពីលោក Robert Morgan ដែលជាអ្នកគ្រប់គ្រង​ចរាចរណ៍​ផ្លូវអាកាស ដែលបានបោះពុម្ពរូបភាពនៃផ្ទាំងបញ្ជា និងប៊ូតុងនៅក្នុងកាប៊ីនយន្ដហោះរួមជាមួយនឹងដំណាក់កាលនៃការហោះហើរ និងបញ្ជាយន្តហោះឱ្យចុះចត ដើម្បីឱ្យអ្នកដំណើរនេះចុះចតយន្តហោះដូចដែលពួកគេណែនាំ។

លោក Morgan បានផ្តល់បទសម្ភាសន៍ដល់ស្ថានីយ៍ទូរទស្សន៍ WBPF ថា នៅ​ពេល​កើតហេតុ គាត់​កំពុង​អាន​សៀវភៅ​នៅ​ខាង​ក្រៅ ភ្លាម​នោះ​ក៏​បាន​ទទួល​ទូរស័ព្ទ​ទាន់​ហេតុការណ៍​ថា អ្នកដំណើរ​គ្មាន​បទពិសោធន៍​កំពុង​បើក​យន្តហោះ​ដើម្បី​ចុះចត។ លោកបានបន្ថែមថា «ខ្ញុំដឹងថា យន្តហោះនេះហោះដូចយន្តហោះដទៃទៀត ដូច្នេះ​ខ្ញុំ​ប្រាប់​គាត់​ឲ្យ​ស្ងប់​ចិត្ត ហើយចង្អុលផ្លូវទៅគាត់ ហើយ​បាន​ប្រាប់​គាត់​ឲ្យ​បន្ថយ​ល្បឿន ដើម្បី​គាត់​អាច​ចត​បាន»។

ចំណែកអ្នកបើកយន្តហោះនេះ ឃើញ​ថា​ក្រោយ​ពីកើត​ហេតុ​គាត់​នៅ​តែ​សន្លប់ ហើយត្រូវបានបញ្ជូនទៅមន្ទីរពេទ្យ ហើយ​នៅ​ពេល​នេះ​គេ​មិន​ទាន់​ដឹង​ថា​វាសនា​យ៉ាងណា​នោះ​ទេ ៕

អត្ថបទ៖ Bee
ប្រភព៖ dailymail