យោងតាមការចុះផ្សាយរបស់សារព័ត៌មាន បាងកកប៉ុស្ដិ៍ បានរាយការណ៍ថា ព្រះសង្ឃជាជនជាតិខ្មែរចំនួន ៤ ព្រះអង្គ ត្រូវបានចាប់ខ្លួននៅវត្តមួយ ក្នុងស្រុកមឿង កាលពីយប់ថ្ងៃអង្គារ ហើយត្រូវបានឱ្យចាក​ផ្នួសភ្លាម ដោយសារព្រះអង្គទាំង៤អង្គបានចូលទៅក្នុងទឹកដីប្រទេសថៃដោយខុសច្បាប់។ លោក Pol Col Preecha Kengsarikij អធិការនគរបាលស្រុកមឿង បាននិយាយថា ក្រុមអ្នកស៊ើបអង្កេតបានទៅវត្តវត្ថារាម ក្នុងសហគមន៍ Non Nong Wat បន្ទាប់ពីទទួលបានដំណឹងថា មានព្រះសង្ឃខ្មែរគង់នៅទីនោះ ហើយបាននិមន្ដបិណ្ឌបាតជារៀងរាល់ព្រឹក។ ពួកគេក៏បានសួររកឯកសារពាក់ព័ន្ធនានាពីព្រះសង្ឃទាំង ៤ អង្គ ហើយគ្រប់ព្រះអង្គសុទ្ធតែមានឯកសារបញ្ជាក់ថា ជាព្រះសង្ឃត្រឹមត្រូវ លើកលែងតែម្យ៉ាង គឺពួកព្រះអង្គគ្មានឯកសារបញ្ជាក់ពីការចូលទៅក្នុងប្រទេសថៃនោះទេ។

ព្រះសង្ឃជាជនជាតិខ្មែរទាំង ៤ អង្គ ​ត្រូវ​បាន​គេ​នាំ​ទៅ​វត្ត​ឃ្លាំង ក្នុង​ស្រុក​មឿង ដែលជា​កន្លែង​ដែលព្រះអង្គ​ត្រូវ​គេឱ្យចាក​ផ្នួស​។ បន្ទាប់មក ត្រូវ​បាន​ឃុំខ្លួន​នៅ​ប៉ុស្តិ៍​ប៉ូលិសស្រុកមឿង រង់ចាំ​ការ​និរទេសមកប្រទេសកំណើតវិញ។ ព្រះសង្ឃទាំង៤អង្គបានតេស្តអវិជ្ជមាន ចំពោះការប្រើប្រាស់គ្រឿងញៀន និងជំងឺ COVID-19 ហើយមាន​ព្រះជន្ម​ពី ​២៥-៤០​ព្រះវស្សា។ ការពិតទៅគឺ ព្រះសង្ឃទាំង៤អង្គបាន​លួច​ឆ្លង​ដែន​ចូល​ទៅ​ក្នុង​ប្រទេស​ថៃ ​នៅ​ស្រុក​កាបឈើង ខេត្ត​សុរិន្ទ ហើយ​បាន​បួស​ជា​ព្រះសង្ឃនៅទីនោះ។ ព្រះសង្ឃទាំង៤អង្គចេញ​ពី​សុរិន្ទ​ដោយ​ថ្មើរ​ជើង ហើយ​បន្ដស្នាក់​នៅ​វត្ត​មួយ​យប់ ​តាម​ផ្លូវ​ទៅ​ខនកែន។ អំឡុងនៅខនកែន ព្រះអង្គបានស្នាក់នៅវត្តវត្ថារាម ហើយបាននិមន្ដប្រមូលបច្ច័យ និងទានតាមទម្លាប់រាល់ព្រឹក។ លោក Pol Col Preecha Kengsarikij បាន​និយាយ​ថាព្រះសង្ឃទាំង៤អង្គបាន​សារភាព​ថា​ បានផ្ញើប្រាក់ដែលប្រមូលបានទៅ​ប្រទេស​កម្ពុជា​៕

អត្ថបទ៖ លីដា
ប្រភព៖ បាងកកប៉ុស្ដិ៍