យ៉ាងហោចណាស់មានសិស្សចំនួន ​១៨​នាក់ និង​គ្រូ​ម្នាក់ ត្រូវ​បាន​គេសម្លាប់ នៅ​ក្នុង​ការ​បាញ់​ប្រហារ​ដ៏​ធំ​មួយ​ នៅ​សាលា​បឋម​សិក្សា​មួយ​ក្នុង​រដ្ឋ​តិចសាស់ របស់សហរដ្ឋ​អាមេរិក។ សមត្ថកិច្ច​មូលដ្ឋាន​បានឱ្យ​ដឹង​ថា ជនសង្ស័យ​ជា​សិស្ស​វិទ្យាល័យ​អាយុ​ ១៨​ឆ្នាំ និងត្រូវបានបាញ់សម្លាប់ដោយប៉ូលីសនៅកន្លែងកើតហេតុតែម្ដង។ ហេតុការណ៍​នេះ​បាន​កើត​ឡើង​កាលពី​វេលា​ថ្ងៃត្រង់​ ថ្ងៃ​អង្គារ​ ក្នុង​ទីក្រុង Uvalde ។ អភិបាលរដ្ឋតិចសាស់ លោក Greg Abbot បាននិយាយថា៖«អ្វីដែលបានកើតឡើងនៅ Uvalde គឺជាសោកនាដកម្មដ៏រន្ធត់ដែលមិនអាចអត់ឱនបាន»។

ការសម្លាប់រង្គាលនេះ បានកើតឡើងនៅសាលាបឋមសិក្សា Robb ក្នុងទីក្រុង Uvalde និងជាការបាញ់ប្រហារដ៏សាហាវបំផុតនៅសាលាបឋមសិក្សារបស់សហរដ្ឋអាមេរិក ចាប់តាំងពីខ្មាន់កាំភ្លើងបានសម្លាប់កុមារ ២០នាក់ និងមនុស្សពេញវ័យ ៦នាក់ នៅឯសាលាបឋមសិក្សា Sandy Hook ក្នុងទីក្រុង Newtown រដ្ឋ Connecticut ជិតមួយទសវត្សរ៍មុន។ ការបាញ់ប្រហារនេះក៏បានកើតឡើងត្រឹមតែ ១០ ថ្ងៃប៉ុណ្ណោះ បន្ទាប់ពីការផ្ទុះឡើងនៃការរើសអើងជាតិសាសន៍ដ៏សាហាវនៅក្នុងផ្សារទំនើបមួយ នៅក្រុង Buffalo នៃរដ្ឋញូវយ៉ក ដែលបានឆក់យកជីវិតមនុស្សប្រមាណជា ១០ នាក់៕

អត្ថបទ៖ លីដា
ប្រភព៖ NHK