ព្រះអង្គម្ចាស់ Harry និងនាង Meghan ដែលជា Duchess of Sussex បានបញ្ចេញរូបថតថ្មីមួយរបស់ Lilibet ដែលជាកូនទី២ របស់ពួកគេ បន្ទាប់ពីថ្ងៃខួបកំណើតគម្រប់ ១ខួប របស់នាងតូចកាលពីថ្ងៃសៅរ៍ នៅឯ Frogmore Cottage ក្នុងក្រុង Windsor ក្នុងចក្រភពអង់គ្លេស នេះបើតាមការចុះផ្សាយរបស់សារព័ត៌មាន CNN។ អ្នក​នាំពាក្យ​បាន​និយាយ​ថា គូស្នេហ៍​មួយ​គូ​នេះ «​មាន​អារម្មណ៍​រំភើប​យ៉ាង​ខ្លាំង​ចំពោះ​ការ​ជូនពរ​ថ្ងៃ​ខួប​កំណើត​រាប់​មិន​អស់​ សម្រាប់​កូនស្រីរបស់ពួកគេគឺ Lilibet Diana Mountbatten-Windsor» ដោយ​បន្ថែម​ថា​ ពួក​គេមានការ​រំភើបយ៉ាង​ខ្លាំង​ដែល​បានដឹងថា ការ​បរិច្ចាគ​ជា​កិត្តិយស​ក្រោមឈ្មោះរបស់ Lilibet សម្រាប់អង្គការ World Central Kitchen (WCK) គឺមានច្រើនជាង ១០០,០០០ ដុល្លារឯណោះ។

អ្នកនាំពាក្យបាននិយាយថា៖«WCK គឺជាអង្គការឈានមុខគេដំបូងគេ ដែលផ្តល់អាហារជាការឆ្លើយតបទៅនឹងវិបត្តិមនុស្សធម៌ អាកាសធាតុ និងសហគមន៍។ ពួកគេបង្កើតប្រព័ន្ធអាហារធន់ជាមួយនឹងដំណោះស្រាយដែលដឹកនាំក្នុងស្រុក។ ថ្មីៗនេះ ពួកគេបានផ្តល់ការគាំទ្រនៅក្រុង Uvalde, រដ្ឋ Texas និងអ៊ុយក្រែន»។ ចំណែកនៅក្នុងរូបភាពថ្មីនោះក៏បានបង្ហាញថា នាងតូច Lilbet ក៏មិនខុសពី Archie ដែលជាបងប្រុសរបស់នាងនោះដែរ ដោយពួកគេទាំង ២ មានសក់ពណ៌ក្រហមដូចជាឪពុក គឺព្រះអង្គម្ចាស់ Harry។ គួរឱ្យដឹងដែរថា Lilibet ត្រូវបានដាក់ឈ្មោះតាមជីដូនដ៏អស្ចារ្យរបស់នាង គឺម្ចាស់ក្សត្រី Elizabeth II ដែលជាស្ដេចស្រីតែមួយគត់ ដែលបន្ដកាន់អំណាចរហូតដល់សព្វថ្ងៃ ពោលគឺ ៧០ឆ្នាំ បន្ទាប់ពីទ្រង់បានសោយរាជ្យនៅឆ្នាំ១៩៥២៕

អត្ថបទ៖ លីដា
ប្រភព៖ CNN