ទីភ្នាក់ងារសន្តិសុខសុខភាពចក្រភពអង់គ្លេស បានកំណត់ជំងឺអុតស្វា Monkeypox ជាជំងឺឆ្លងដែលតម្រូវឱ្យមានការជូនដំណឹង

ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បាននិយាយថា ជំងឺអុតស្វា Monkeypox នឹងត្រូវកំណត់ថា ជាជំងឺឆ្លងដែលតម្រូវឱ្យមានការជូនដំណឹង (notifiable infectious disease) ចាប់ពីថ្ងៃពុធនេះ ដែលមានន័យថា គ្រូពេទ្យនៅក្នុងប្រទេសអង់គ្លេសទាំងអស់ នឹងត្រូវជូនដំណឹងដល់អាជ្ញាធរមូលដ្ឋាន នៅពេលដែលពួកគេសង្ស័យថា នរណាម្នាក់មានផ្ទុកជំងឺនេះ។

លោក Wendi Shepherd នាយកឧប្បត្តិហេតុជំងឺ Monkeypox នៅ UKHSA បាននិយាយនៅក្នុងសេចក្តីថ្លែងការណ៍មួយថា៖«ការធ្វើរោគវិនិច្ឆ័យ និងការរាយការណ៍យ៉ាងឆាប់រហ័ស គឺជាគន្លឹះក្នុងការរំខានដល់ការឆ្លង និងការទប់ស្កាត់ការរីករាលដាលបន្ថែមទៀតនៃជំងឺអុតស្វា Monkeypox។ ច្បាប់ថ្មីនេះនឹងគាំទ្រដល់យើង និងដៃគូសុខភាពរបស់យើង ក្នុងការកំណត់អត្តសញ្ញាណ ព្យាបាល និងគ្រប់គ្រងជំងឺនេះបានយ៉ាងឆាប់រហ័ស»៕

អត្ថបទ៖ លីដា
ប្រភព៖ រ៉យទ័រ