កូនប្រុសរបស់មហាសេដ្ឋី Elon Musk គឺ Xavier Alexander Musk កាលពីពេលថ្មីៗនេះ បានដាក់ពាក្យប្ដឹងទៅតុលាការស្រុក LA Santa Monica ដើម្បីប្ដូរឈ្មោះ និងភេទ បន្ទាប់ពីបានវះកាត់កែភេទទៅជាស្រីបានសម្រេច។ Xavier Alexander អាយុ ១៨ឆ្នាំ បានដាក់ញត្តិទៅតុលាការដើម្បីសុំប្ដូរឈ្មោះ និងភេទថ្មី ដោយសារ​យុវជនរូបនេះ មិនចង់មានទំនាក់ទំនងជាមួយឪពុករបស់ខ្លួន គឺលោក Musk ទោះក្នុងទំនាក់ទំនងអ្វីក៏ដោយ។

ជាមួយគ្នានេះដែរ Xavier ស្នើសុំប្ដូរឈ្មោះទៅជា Vivian Jenna Wilson ហើយចង់ប្ដូរពីភេទប្រុស ទៅស្រី វិញ រួមទាំងប្រើនាមត្រកូលដូចទៅនឹងម្ដាយរបស់ខ្លួនគឺលោកស្រី Justin Wilson ដែល​បាន​លែង​លះជាមួយលោក Musk ក្នុង​ឆ្នាំ ២០០៨។ ទោះជាយ៉ាងណាក្ដី បច្ចុប្បន្ន​មិន​មាន​ព័ត៌មាន​ច្បាស់​លាស់​អំពី​ជម្លោះ​រវាង Xavier ទេ ហើយមកទល់ពេលនេះមេធាវីរបស់លោក Musk និងមន្ត្រីទំនាក់ទំនងប្រព័ន្ធផ្សព្វផ្សាយរបស់ Tesla ក៏មិនទាន់ចេញមុខបកស្រាយអំពីរឿងនេះនៅឡើយដែរ​។

គួរឱ្យដឹងថា ទីភ្នាក់ងារសារព័ត៌មាន Reuters បានរាយការណ៍ថា បន្ទាប់ពីយុវជន Xavier បានដាក់ញត្តិត្រឹមតែមួយខែ ដើម្បីសុំឱ្យតុលាការផ្លាស់ប្តូរឈ្មោះ និងភេទ លោក Musk ក៏បានសន្យាថា នឹងគាំទ្រគណបក្សសាធារណរដ្ឋដែលតស៊ូមតិសម្រាប់ការរឹតបន្តឹងសិទ្ធិអ្នកប្តូរភេទនៅក្នុងរដ្ឋនានានៅទូទាំងសហរដ្ឋអាមេរិក៕

អត្ថបទ៖ Bee

ប្រភព៖ sanook

​