ប្រធានាធិបតីអ៊ុយក្រែនលោក Volodymyr Zelenskyy បានថ្កោលទោសយ៉ាងខ្លាំង ចំពោះការវាយប្រហារដោយមីស៊ីលរបស់រុស្ស៊ី ទៅលើផ្សារទំនើបមួយនៅទីក្រុង Kremenchuk កាលពីថ្ងៃចន្ទ។ នៅក្នុងកិច្ចប្រជុំក្រុមប្រឹក្សាសន្តិសុខបន្ទាន់មួយកាលពីថ្ងៃអង្គារ លោក ​Zelenskyy បាន​ហៅ​ទង្វើនោះថា ជា​អំពើ​ភេរវកម្ម ហើយ​បាន​និយាយ​ថា រុស្ស៊ី​គួរ​ត្រូវ​បាន​បណ្តេញ​ចេញ​ពី​ក្រុមប្រឹក្សា​សន្តិសុខ​អង្គការ​សហប្រជាជាតិ។ ជម្រាបផងដែរថា កិច្ចប្រជុំ​ត្រូវ​បាន​រៀបចំ​ឡើង​ភ្លាម បន្ទាប់​ពី​ការ​វាយប្រហារ​ដោយមីស៊ីលរបស់​រុ​ស្ស៊ី​ មានសន្ទុះកាន់តែ​ខ្លាំងក្លា​នៅ​ភាគ​កណ្តាលប្រទេស​អ៊ុយ​ក្រែ​ន។

ការិយាល័យប្រធានាធិបតីអ៊ុយក្រែនបាននិយាយថា មនុស្សយ៉ាងហោចណាស់ ២០នាក់ ត្រូវបានបញ្ជាក់ថាបានស្លាប់ នៅក្នុងការវាយប្រហារនោះ ខណៈយ៉ាងហោចណាស់មានពលរដ្ឋ ៤០នាក់ ផ្សេងទៀតត្រូវបានបាត់ខ្លួន។ លោក Zelenskyy បាននិយាយថា៖«យើងត្រូវធ្វើសកម្មភាពភ្លាមៗ ហើយធ្វើអ្វីគ្រប់យ៉ាងដើម្បីធ្វើឱ្យរុស្ស៊ីបញ្ឈប់ការសម្លាប់កុមារ មនុស្សទូទៅ – អ្នករាល់គ្នា»។ លោក​បាន​និយាយ​ថា៖«រុស្ស៊ី​គ្មាន​សិទ្ធិ​បន្ត​នៅ​ក្នុង​ក្រុម​ប្រឹក្សា​សន្តិសុខ​អង្គការ​សហប្រជាជាតិនោះ​ទេ ហើយវា​ជា​ការ​ចាំបាច់ ​ក្នុង​ការ​ដក​ប្រតិភូ​រុស្ស៊ី​ពី​ឱកាស​ក្នុង​ការក្រឡុក​អង្គការសហប្រជាជាតិ​»​។

សហរដ្ឋអាមេរិក ប្រជាជាតិអឺរ៉ុបមួយចំនួន និងប្រទេសផ្សេងទៀត ក៏បានថ្កោលទោសរុស្ស៊ីផងដែរ។ ជាក់ស្ដែង ឯកអគ្គរដ្ឋទូតអង្គការសហប្រជាជាតិរបស់អាល់បានី លោក Ferit Hoxha បាននិយាយថា «ការវាយប្រហារដោយមិនរើសអើងលើហេដ្ឋារចនាសម្ព័ន្ធស៊ីវិល និងជនស៊ីវិលស្លូតត្រង់ គឺជាឧក្រិដ្ឋកម្មសង្គ្រាម»។ លោក​បាន​និយាយ​ថា អ្នក​ដែល​សម្រេច​ចិត្ត​វាយ​ប្រហារ​លើ​មូលដ្ឋាន​ជន​ស៊ីវិល «ត្រូវ​តែ​ទទួលខុសត្រូវ​លើ​សកម្មភាព​របស់​ពួកគេ»។ យ៉ាងណាក៏ដោយ តំណាង​រុស្ស៊ី​លោក Dmitry Polyansky បាន​អះអាង​ថា ការ​វាយ​ប្រហារ​មិន​មែន​លើ​មជ្ឈមណ្ឌល​លក់​ទំនិញ​នោះ​ទេ គឺ​ស្ថិត​នៅ​លើ​ឃ្លាំង​អាវុធ​របស់​អ៊ុយក្រែន៕

អត្ថបទ៖ The President of Ukraine