កាលពីថ្ងៃទី០៦ ខែកក្កដា សារព័ត៌មាន CNN បានរាយការណ៍ថា ទីក្រុង Xi’an ដែលមានប្រជាជនចំនួន ១៣លាននាក់នៅក្នុងខេត្ត Shaanxi ភាគកណ្តាលប្រទេសចិន នឹងត្រូវបិទទ្វារតាមតំបន់មួយចំនួនរយៈពេលប្រាំពីរថ្ងៃ ដោយចាប់ផ្តើមពីថ្ងៃពុធ ទី០៦ ខែកក្កដាតទៅ បន្ទាប់ពីមានការរាយការណ៍ជាលើកដំបូងនៃករណីឆ្លងជំងឺកូវីដ-១៩ ប្រភេទ omicron BA.5.2។

​បើ​តាម​មន្ត្រី​គ្រប់គ្រង​ជំងឺ​ក្នុង​តំបន់នៃទីក្រុង Xi’an មានករណីឆ្លងជំងឺកូវីដ-១៩ ប្រភេទ Omicron BA.5.2 ដែលត្រូវបានបញ្ជាក់ចំនួន ១៨ករណីកាលពីថ្ងៃសៅរ៍ ទី០២ ខែកក្កដា ដល់ថ្ងៃច័ន្ទ ទី០៤ ខែកក្កដា។ នេះជាលើកទីមួយនៃការផ្ទុះឡើងវិញ ដែលត្រូវបានរាយការណ៍នៅក្នុងទីក្រុង Xi’an ដែលជាកន្លែងមួយក្នុងចំណោមកន្លែងចុងក្រោយបំផុតនៅលើពិភពលោកដែលនៅតែប្រកាន់ខ្ជាប់នូវគោលការណ៍ “សូន្យកូវីដ” ដ៏តឹងរឹង។

អ្នកស្រាវជ្រាវបានកំណត់អត្តសញ្ញាណ BA.5.2 ជាប្រភេទរងនៃ BA.5 ដែលបានរីករាលដាលរួចហើយនៅក្នុងសហរដ្ឋអាមេរិក ហើយប្រភេទនេះ គឺខ្លាំងជាងអង់ទីករ សម្រាប់អ្នកដែលធ្លាប់កើតកូវីដ-១៩ ពីមុន ក៏ដូចជាអ្នកដែលត្រូវបានចាក់វ៉ាក់សាំងពេញលេញ។ លោក Zhang Xuedong មន្ត្រីនៅទីក្រុង Xi’an បាននិយាយនៅក្នុងសន្និសីទសារព័ត៌មាននៅថ្ងៃអង្គារ ទី៥ ខែកក្កដា ថា “វិធានការបណ្តោះអាសន្នរយៈពេលប្រាំពីរថ្ងៃ គឺសំដៅធ្វើឱ្យសង្គមមានភាពស្ងប់ស្ងាត់តាមដែលអាចធ្វើទៅបាន ព្រមទាំងកាត់បន្ថយការចល័ត ការផ្លាស់ទី… និងហានិភ័យនៃការឆ្លងមេរោគប្រភេទផ្សេងគ្នា”។

គួរបញ្ជាក់ផងដែរថា ការរឹតបន្តឹង តម្រូវឱ្យកន្លែងកម្សាន្ត កន្លែងកីឡានិងវប្បធម៌ បារ រោងកុន កន្លែងហាត់ប្រាណ បណ្ណាល័យ សារមន្ទីរ និងកន្លែងផ្តល់សេវាកម្មនានា ត្រូវតែបិទទ្វារ។ ជាមួយគ្នានេះ ការទទួលទានអាហារក្នុងហាង និងការជួបជុំធំៗ រួ​មទាំងពិធីមង្គលកា ការប្រជុំ ត្រូវផ្អាកសេវាកម្មជាបណ្តោះអាសន្ន ខណៈ​កន្លែង​គោរព​បូជា និង​សកម្មភាព​សាសនា​ត្រូវ​បាន​ហាម​ឃាត់​មិន​ឱ្យ​បិទ និង​ប្រារព្ធ​ធ្វើដែរ។ មិនតែប៉ុណ្ណោះសាលាមត្តេយ្យ បឋមសិក្សា និងអនុវិទ្យាល័យ ក៏ត្រូវបានបញ្ជាឱ្យចាប់ផ្តើមថ្ងៃឈប់សម្រាករដូវក្តៅមុននេះ ដោយសារសាកលវិទ្យាល័យជាច្រើនត្រូវបានជូនដំណឹងអំពីការបិទបរិវេណសាលា និងអាជ្ញាធរបានប្រកាសពីការចាក់សោរនៅក្នុងសង្កាត់ចំនួនប្រាំបួនដែលត្រូវបានចាត់ថ្នាក់ជា “តំបន់ដែលមានហានិភ័យខ្ពស់” ដោយការហាមឃាត់អ្នកស្រុកមិនឱ្យចាកចេញពីសហគមន៍៕

អត្ថបទ៖ Bee
ប្រភព៖ khaosod