ប្រធានាធិបតីអាមេរិកលោក ចូ បៃដិន បានប្រាប់ទៅកាន់នាយករដ្ឋមន្ត្រីជប៉ុនលោក ហ្វូមីអូ គីស៉ីដា ក្នុងអំឡុងពេលហៅទូរសព្ទ នៅថ្ងៃសុក្រ ទី០៨ ខែកក្កដា ពីការខឹងសម្បាររបស់លោក ចំពោះការធ្វើឃាតលើអតីតមេដឹកនាំលោក អាបេ ស៊ីនហ្សូ ដែលត្រូវបានខ្មាន់កាំភ្លើងបាញ់ប្រហារ នៅពេលគាត់កំពុងធ្វើយុទ្ធនាការបោះឆ្នោតសភា។ សេតវិមានបាននិយាយនៅក្នុងសេចក្តីថ្លែងការណ៍មួយថា៖«ប្រធានាធិបតី បៃដិន បានទូរស័ព្ទទៅកាន់នាយករដ្ឋមន្ត្រី គីស៉ីដា របស់ប្រទេសជប៉ុននៅថ្ងៃនេះ ដើម្បីសម្តែងការខឹងសម្បារ ទុក្ខសោក និងចូលរួមរំលែកទុក្ខយ៉ាងជ្រាលជ្រៅ ចំពោះការបាញ់ប្រហារ និងហឹង្សាដ៏សង្វេគ លើអតីតនាយករដ្ឋមន្ត្រីលោក អាបេ ស៊ីនហ្សូ»។

ឃាតកម្មលើអ្នកនយោបាយដ៏ល្បីរបស់ជប៉ុន បានធ្វើឱ្យប្រទេសនេះ ញ័ររន្ធត់ និងបង្កការភ្ញាក់ផ្អើលជុំវិញពិភពលោក ជាពិសេសដោយសារប្រទេសមានឧក្រិដ្ឋកម្មហឹង្សាតិចតួច ហើយច្បាប់កាំភ្លើងក៏មានភាពតឹងរឹង។ ជនសង្ស័យ​ដែល​ត្រូវ​បាន​គេ​ចោទ​ប្រកាន់​ពី​បទ​បាញ់​ប្រហារលើ​លោក អាបេ កំពុង​ស្ថិត​ក្នុង​មន្ទីរ​ឃុំឃាំង ដោយ​ប៉ូលិស​បាន​និយាយ​ថា គេ​បាន​សារភាព​ថា​ បាន​ធ្វើ​ឃាត​អតីត​នាយក​រដ្ឋមន្ត្រី​រូបនេះ ដោយសារគាត់គិតថាលោក អាបេ មាន​ទំនាក់​ទំនង​ជាមួយ​ក្រុមមួយដែលលោកមិនពេញចិត្ត។ យ៉ាងណាក៏ដោយ ឥឡូវនេះប៉ូលីសនៅតែបន្ដស៊ើបអង្កេតទៅលើករណីនេះបន្ថែមទៀត៕

អត្ថបទ៖ លីដា
ប្រភព៖ Channel News Asia