មជ្ឈមណ្ឌលគ្រប់គ្រងស្ថានការណ៍ជំងឺ COVID-19 របស់ប្រទេសថៃ (CCSA) បាននិយាយថា ចំនួនករណី COVID-19 នៅក្នុងប្រទេសថៃនឹងចាប់ផ្តើមកើនឡើងនៅសប្តាហ៍ក្រោយ ហើយគួរតែឈានដល់កម្រិតខ្ពស់បំផុតនៅខែកញ្ញា។ អ្នកនាំពាក្យ CCSA លោកវេជ្ជបណ្ឌិត Taweesilp Visanuyothin កាលពីថ្ងៃសុក្របានបញ្ជាក់ថា ការកើនឡើងអាចមានដោយសារការបន្ធូរបន្ថយវិធានការត្រួតពិនិត្យជំងឺ រួមទាំងការលើកលែងការពាក់ម៉ាស់នៅកន្លែងសាធារណៈមួយចំនួន។ ទោះជាយ៉ាងណាក៏ដោយ មជ្ឈមណ្ឌលប៉ាន់ស្មានថា ជាមួយនឹងការបន្តចាក់វ៉ាក់សាំង និងប្រជាជនដែលប្រកាន់ខ្ជាប់នូវការណែនាំរបស់ក្រសួងសុខាភិបាលសាធារណៈ ដើម្បីជៀសវាងកន្លែងមានមនុស្សច្រើន និងការជួបជុំសាធារណៈ ការឆ្លងប្រចាំថ្ងៃនឹងចាប់ផ្តើមធ្លាក់ចុះចាប់ពីខែវិច្ឆិកា។

CCSA បានជំរុញឱ្យក្រសួងសុខភាពសាធារណៈវាយតម្លៃស្ថានភាពយ៉ាងដិតដល់ ដើម្បីធានាថា ការចូលមន្ទីរពេទ្យ ការកាន់កាប់គ្រែសម្រាកព្យាបាល និងការស្លាប់ត្រូវបានរក្សាទុកក្នុងកម្រិតដែលអាចគ្រប់គ្រងបាន។ នេះមានន័យថា ការចូលកាន់កាប់មិនត្រូវលើសពី ៤,០០០ ទេ ពោលគឺតិចជាង ២៥% នៃគ្រែមន្ទីរពេទ្យដែលកាន់កាប់ដោយអ្នកជំងឺក្នុងស្ថានភាពធ្ងន់ធ្ងរ ហើយចំនួនអ្នកស្លាប់ប្រចាំថ្ងៃត្រូវបានរក្សាទុកតិចជាង ៤០។

ប្រជាជនកំពុងត្រូវបានលើកទឹកចិត្តឱ្យបន្តពាក់ម៉ាស់នៅកន្លែងដែលមានមនុស្សច្រើន ឬកន្លែងមានខ្យល់ចេញចូលមិនល្អ ខណៈដែលប្រតិបត្តិករនៃកន្លែងដែលមានហានិភ័យខ្ពស់ដូចជាកន្លែងកម្សាន្ត កំពុងត្រូវបានជំរុញឱ្យប្រើវិធានការគ្រប់គ្រងជំងឺយ៉ាងតឹងរ៉ឹង ដើម្បីបញ្ឈប់ការរីករាលដាលនៃមេរោគ។ លោក Taweesilp បាននិយាយថា៖«លើសពីនេះ មនុស្សដែលមានអាយុលើសពី ៦០ឆ្នាំ ជាពិសេសអ្នកដែលមានហានិភ័យខ្ពស់ គួរតែទទួលបានការចាក់ដូចជំរុញបន្ថែម។ រហូតមកដល់ពេលនេះ មានតែ ៤៧.១% ឬ ៥.៩៨ លាននាក់ ក្នុងចំណោមមនុស្ស ១២.៧ លាននាក់ នៅក្នុងក្រុមនេះ បានទទួលការចាក់ដូសជំរុញលើកទី១ របស់ពួកគេ»៕

អត្ថបទ៖ លីដា
ប្រភព៖ The Nation Thailand