ក្រសួងសុខាភិបាលវៀតណាម នៅថ្ងៃព្រហស្បតិ៍ ទី១៤ ខែកក្កដា ឆ្នាំ២០២២ បានរាយការណ៍ថា ករណីជំងឺគ្រុនឈាមនៅក្នុងប្រទេស គិតមកដល់ពេលនេះមានការកើនឡើងទ្វេដង បើប្រៀបធៀបទៅនឹងរយៈពេលដូចគ្នាក្នុងឆ្នាំ២០២១ ហើយបានបង្គាប់ឱ្យមន្ទីរពេទ្យរបស់ខ្លួន ត្រៀមខ្លួនរួចជាស្រេចដើម្បីទប់ស្កាត់ការឆ្លងបន្ថែមទៀត។ គ្រុនឈាមគឺជា​ជំងឺចម្លង​ដោយ​សត្វ​មូស​ ដែល​កើតមាន​ញឹកញាប់​ក្នុង​តំបន់​អាស៊ីអាគ្នេយ៍ និងមានរោគសញ្ញា​ស្រដៀងជំងឺ​ផ្តាសាយ។ ករណីធ្ងន់ធ្ងរនឹងធ្វើឱ្យហូរឈាម និងមិនមាន​វ៉ាក់សាំងការពារ​ទេ​។

ប្រទេសដែលមានប្រជាជន ៩៨ លាននាក់ មួយនេះ ជាធម្មតាបានកត់ត្រាករណីជំងឺគ្រុនឈាមចំនួន ១១០,០០០ ករណី ជារៀងរាល់ឆ្នាំក្នុងប៉ុន្មានឆ្នាំថ្មីៗនេះ ដោយមានការឆ្លងកើនឡើងជាធម្មតានៅចន្លោះខែមិថុនា ដល់ខែតុលា។ យ៉ាងណាក្រសួងបាននិយាយថា៖«ចំនួនករណីត្រូវបានគេព្យាករណ៍ថា នឹងបន្តកើនឡើងបន្ថែមទៀត ជាមួយនឹងករណីធ្ងន់ធ្ងរ ដែលត្រូវសម្រាកនៅមន្ទីរពេទ្យ»។ ដូច្នេះ មន្ទីរពេទ្យទាំងនៅថ្នាក់ខេត្ត និងស្រុក ចាំបាច់ត្រូវផ្តោតលើធនធានរបស់ពួកគេ ដើម្បីទទួល និងព្យាបាលករណីធ្ងន់ធ្ងរ។

ជម្រាបដែរថា ប្រទេសវៀតណាមបានកត់ត្រាករណីជំងឺគ្រុនឈាមចំនួន ៨៩,១២០ ក្នុងរយៈពេល ៦ ខែដំបូង ក្នុងឆ្នាំនេះ ដែលកើនឡើងពីចំនួន ៣៥,៩៣៦ កាលពីឆ្នាំមុន ពោលគឺកើនឡើង ១៤៨ ភាគរយ។ ចំណែកការស្លាប់បានកើនឡើង ៣ដង ដល់ ៣៤នាក់ ក្នុងរយៈពេលដូចគ្នា៕

អត្ថបទ៖ លីដា
ប្រភព៖ Channel News Asia