ស្ត្រីជនជាតិអាមេរិកម្នាក់មានឈ្មោះថា Brandy Bottone អាយុ ៣៤ឆ្នាំត្រូវបានពិន័យជាប្រាក់ចំនួន ២៧៥ដុល្លារ ដោយប៉ូលីសរដ្ឋតិចសាស់ ដោយសារតែនាងបានបើកបរតែម្នាក់ឯងនៅក្នុងគន្លងដែលតម្រូវអោយមានអ្នកដំណើររួមជាមួយ។ ស្ត្រីរូបនេះ​មាន​ផ្ទៃពោះ​ ៣៤​សប្តាហ៍ កំពុងប្រញាប់​ទៅ​ទទួល​កូនប្រុស​នៅ​សាលា ប៉ុន្តែ​ត្រូវ​បាន​ប៉ូលិស​ហៅ​ឱ្យ​ឈប់រថយន្ត ហើយ​បាន​សួរ​ថា «ហេតុ​អ្វី​បាន​ជា​គាត់​បើក​បរ​ក្នុង​ផ្លូវ​ចរាចរណ៍​នោះ ទាំងដែល​គាត់ធ្វើដំណើរតែម្នាក់ឯង?»។ បន្ទាប់មកអ្នកស្រី Bottone ក៏បានឆ្លើយ​ប្រាប់​ប៉ូលិស​ថា៖ គាត់មិនបានបើកបរតែម្នាក់ឯងទេ ប៉ុន្តែគាត់មានកូនម្នាក់នៅក្នុងផ្ទៃ។

“គាត់បានសួរថា “មានអ្នកផ្សេងនៅក្នុងឡានទេ?” ហើយបន្ទាប់មកគាត់ក៏បានមើលទៅក្នុងឡានរបស់ខ្ញុំ ហើយខ្ញុំក៏ឆ្លើយថា “មានតើ” ហើយគាត់ក៏បានសួរបន្តថា នៅឯណា? ខ្ញុំក៏បានចង្អុលមកកាន់ពោះរបស់ខ្ញុំថា “នៅក្នុងនេះ” នេះជាសម្តីដែលអ្នកស្រី Bottone រៀបរាប់ប្រាប់សារព័ត៌ CNN។

រឿងនេះ​បាន​ទាក់ទាញ​ការ​ចាប់​អារម្មណ៍​យ៉ាង​ខ្លាំង​ពី​អ្នក​ប្រើ​អ៉ីនធឺណិត​នៅ​អាមេរិក ពីព្រោះមុននេះបន្តិច តុលាការកំពូលរបស់សហរដ្ឋអាមេរិកបានសម្រេចថា អ្នកដែលអាចកំណត់សិទ្ធិរំលូតកូន មិនមែនជាអំណាចរបស់រដ្ឋាភិបាលសហព័ន្ធទេ ប៉ុន្តែជាអំណាចនៃរដ្ឋនីមួយៗ ដែលរដ្ឋតិចសាស់ ដែលជាកន្លែងកើតហេតុនោះ ព្យាយាមចេញច្បាប់ដើម្បីហាមឃាត់ការរំលូតកូន ដោយហេតុផលថា អំប្រ៊ីយ៉ុងឬទារកដែលមិនទាន់កើត គឺជាមនុស្សនៅក្រោមច្បាប់ព្រហ្មទណ្ឌរបស់រដ្ឋ។

យ៉ាងណាមិញ អ្នក​និយម​លេង​អ៉ីនធឺណិត​មួយ​ចំនួន ​បាន​សរសើរ​ចំពោះ​ការ​ឆ្លើយ​តប​របស់​លោកស្រី Botton ផង​ដែរ ព្រោះ​ពល​រដ្ឋ​ត្រូវបានរឹតត្បិត​សិទ្ធិ​រំលូត​កូន ដោយសារតែចាត់ទុក​អំប្រ៊ីយ៉ុង​ជា​មនុស្ស អំប្រ៊ីយ៉ុងត្រូវរាប់ជាអ្នកដំណើរម្នាក់ទៀត ហើយចម្លើយនេះគឺចង្អុលបង្ហាញពីចន្លោះប្រហោងរបស់ច្បាប់ បន្ទាប់​ពី​តុលាការ​កំពូល​អាមេរិក​បាន​ចេញ​សេចក្តី​សម្រេច​បដិសេធ​សេចក្តី​សម្រេច​សិទ្ធិ​រំលូត​កូន​ដែលមានពីមុនមក។ ទោះជាយ៉ាងណាក្ដី លោកស្រី Bottone មានការខឹងសម្បារយ៉ាងខ្លាំង បន្ទាប់ពីប៉ូលីសបានអះអាងថា «នឹងមិនស្តាប់ការលើកឡើងរបស់នាង» ប៉ុន្តែអ្នកស្រីបានបញ្ជាក់ប្រាប់ថា មូលហេតុដែលមានការឆ្លើយតបបែបនោះ គឺមិនមែនជាគោលជំហរដែលពាក់ព័ន្ធនឹងយោបាយស្តីពីសិទ្ធិរំលូតកូននោះទេ គ្រាន់តែចង់ឱ្យប៉ូលីសលុបចោលសំបុត្រផាកពិន័យខ្លួនឯងតែប៉ុណ្ណោះ។ បច្ចុប្បន្ន អ្នកស្រី Bottone កំពុងជួលមេធាវីដើម្បីការពារសំណុំរឿងរបស់នាង ហើយនឹងទៅតុលាការក្នុងខែកក្កដា ប្រសិនបើអ្នកស្រីពុំទាន់សម្រាលកូនក្នុងផ្ទៃនោះទេ៕

អត្ថបទ៖ Bee
ប្រភព៖ sanook