អ្នកនាំពាក្យក្រសួងការបរទេសចិន លោក Zhao Lijian កាលពីថ្ងៃអង្គារម្សិលមិញនេះបាននិយាយថា សហរដ្ឋអាមេរិកគួរតែបញ្ឈប់ការនិយាយបញ្ឆេះរឿងយោធា និងអាវុធនៅលំហអាកាស។ លោកបានធ្វើការកត់សម្គាល់បែបនេះ នៅក្នុងសន្និសីទសារព័ត៌មានធម្មតាមួយ នៅពេលដែលគាត់ត្រូវបានគេសួរឱ្យធ្វើអត្ថាធិប្បាយលើរបាយការណ៍ដែលថា កងកម្លាំងអវកាសអាមេរិកថ្មីៗនេះ កំពុងមានសកម្មភាពនៅមជ្ឈមណ្ឌលស៊ើបការណ៍អវកាសរបស់ខ្លួន។ លោក Zhao បានសង្កត់ធ្ងន់ថា លំហអាកាសគឺជាវិស័យសាធារណៈ និងជាកត្តាសំខាន់ក្នុងសន្តិសុខ និងសុខុមាលភាពរបស់មនុស្សជាតិ។ ការទប់ស្កាត់ការប្រណាំងប្រជែងសព្វាវុធក្នុងលំហ គឺជាតម្រូវការដ៏សំខាន់សម្រាប់ធានាសន្តិភាព ភាពស្ងប់ស្ងាត់ និងការប្រើប្រាស់លំហអាកាស ប្រកបទៅដោយនិរន្តរភាព។

លោក Zhao បាននិយាយថា៖«សហរដ្ឋអាមេរិក គឺជាកត្តាជំរុញដ៏សំខាន់ ក្នុងការប្រែក្លាយអវកាសខាងក្រៅទៅជាឃ្លាំងអាវុធ និងសមរភូមិ»។ អស់រយៈពេលជាយូរមកហើយ សហរដ្ឋអាមេរិកបានបន្តយុទ្ធសាស្ត្រគ្រប់គ្រងលើលំហ និងបានកំណត់លំហខាងក្រៅដោយបើកចំហថា ជាដែនប្រយុទ្ធរបស់ខ្លួណ ហើយវាបាននិងកំពុងអភិវឌ្ឍយ៉ាងខ្លាំងក្លា និងដាក់ពង្រាយអាវុធអវកាសវាយលុកជាច្រើនប្រភេទដូចជា ថាមពលដឹកនាំ និងប្រព័ន្ធទំនាក់ទំនង (Counter Communications System)។ លោក​បាន​បន្ថែម​ថា សហរដ្ឋ​អាមេរិក​បាន​ធ្វើ​សមយុទ្ធ​យោធា​ជា​ញឹក​ញាប់ និង​ការ​កសាង​ និង​ត្រៀម​លក្ខណៈ​យោធា​គ្រប់​ជ្រុងជ្រោយ​នៅ​ក្នុង​លំហ​អាកាស។

លោកបានបន្ថែមថា៖«សហរដ្ឋអាមេរិកបានចូលរួមក្នុងការលួចស៊ើបការណ៍ និងការឈ្លបយកការណ៍យ៉ាងជិតស្និទ្ធនៅក្នុងដែនអវកាស ដូចដែលខ្លួនបានធ្វើនៅក្នុងកន្លែងផ្សេងទៀត។ វានឹងនាំមកនូវផលប៉ះពាល់អវិជ្ជមានយ៉ាងធ្ងន់ធ្ងរដល់ស្ថិរភាពជាយុទ្ធសាស្ត្រសកល និងជាការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខនៅក្នុងលំហអាកាស។ លោក Zhao បានជំរុញឱ្យសហរដ្ឋអាមេរិក គួរមានឥរិយាបទប្រកបដោយទំនួលខុសត្រូវក្នុងលំហអាកាស បញ្ឈប់ការបញ្ឆេះរឿងការធ្វើយោធា និងការបំពាក់អាវុធពីលំហអាកាស ហើយទទួលខុសត្រូវយ៉ាងម៉ឺងម៉ាត់ក្នុងការការពារសន្តិភាព និងស្ថិរភាពនៅក្នុងលំហអាកាស៕

អត្ថបទ៖ លីដា
ប្រភព៖ ស៊ីនហួរ