សហរដ្ឋអាមេរិកបាននិយាយថា ខ្លួននឹងបញ្ជូនប្រព័ន្ធរ៉ុក្កែត High Mobility Artillery Rocket Systems ឬ HIMARS ដល់អ៊ុយក្រែនចំនួន ៤គ្រឿង បន្ថែមទៀត ខណៈដែលយោធារុស្ស៊ីកំពុងបង្កើនការវាយលុកមកលើអ៊ុយក្រែន។ រដ្ឋមន្ត្រីការពារជាតិអាមេរិក លោក Lloyd Austin បានបង្ហាញពីជំនួយយោធាបន្ថែមសម្រាប់អ៊ុយក្រែននេះ នៅក្នុងកិច្ចប្រជុំតាមអ៉ីនធឺណិតមួយកាលពីថ្ងៃពុធ ដោយមានការចូលរួមពីគណៈប្រតិភូមកពីប្រទេសប្រហែល ៥០ ដើម្បីពិភាក្សាលើការផ្តល់ជំនួយដល់អ៊ុយក្រែន។ លោក Austin បាននិយាយថា៖«នេះគឺជាដំណាក់កាលដ៏សំខាន់នៃជម្លោះ។ ដូច្នេះហើយ ការគាំទ្ររួមរបស់យើង សម្រាប់អ៊ុយក្រែនគឺសំខាន់ និងបន្ទាន់ណាស់»។

រដ្ឋមន្ត្រីការពារជាតិអ៊ុយក្រែន លោក Oleksii Reznikov បានពន្យល់ថា កងកម្លាំងរុស្ស៊ីកំពុងបន្តការបាញ់ផ្លោងយ៉ាងខ្លាំងក្លា ដើម្បីពង្រីកតំបន់ដែលពួកគេគ្រប់គ្រងនៅភាគខាងកើតអ៊ុយក្រែន។ ដូច្នេះហើយ ការផ្ដល់ជូននូវបញ្ជូនប្រព័ន្ធរ៉ុក្កែត HIMARS របស់សហរដ្ឋអាមេរិក នឹងជួយដល់កងកម្លាំង​អ៊ុយក្រែនអាចវាយប្រហារ​ប៉ុស្តិ៍​បញ្ជាការ​រុស្ស៊ី​ និង​គោលដៅ​យោធា​ផ្សេងទៀត ដោយសារប្រព័ន្ធរ៉ុក្កែត HIMARS អាចបាញ់បានចម្ងាយឆ្ងាយ និងច្បាស់លាស់។ ជម្រាបផងដែរថា សហរដ្ឋអាមេរិកបានផ្ដល់នូវប្រព័ន្ធ HIMARS ដល់ប្រទេសអ៊ុយក្រែនចំនួន ១២ គ្រឿង រួចមកហើយដែរ។

លោក Austin ​បាន​បន្ត​ថា​៖ «​អ៊ុយក្រែន​ត្រូវ​ការ​សព្វាវុធ​ និង​គ្រាប់​ផ្ទុះ ដើម្បី​បង្កើន​របាំង​ការពារ​របស់​ខ្លួន​ និង​វាយ​បក​ទៅវិញ​»​ ដោយ​បន្ថែម​ថា​ អាមេរិក​កំពុង​ «ប្រឹងប្រែង​ខ្លាំង​ក្នុង​ការ​រក្សា​ និង​បង្កើន​សន្ទុះ​នៃ​ការ​បរិច្ចាគ»។ ប្រធានាធិបតីអ៊ុយក្រែន លោក Volodymyr Zelenskyy ក៏បានស្វាគមន៍ជំនួយយោធាបន្ថែមនេះ ហើយនៅក្នុងវីដេអូដែលបានចេញផ្សាយកាលពីថ្ងៃពុធ លោក Zelenskyy បាននិយាយថា៖«វានឹងចាំបាច់ក្នុងការបង្កើនការផ្គត់ផ្គង់អាវុធទំនើបដល់អ៊ុយក្រែន ដើម្បីផ្តល់ឱ្យរដ្ឋរបស់យើងនូវការការពារដែនអាកាសប្រកបដោយប្រសិទ្ធភាព»៕

អត្ថបទ៖ លីដា
ប្រភព៖ រ៉យទ័រ