ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្រ ទី២២ ខែកក្កដា បាននិយាយថា ប្រទេសអ៊ុយក្រែនមានគ្រាប់ធញ្ញជាតិមានតម្លៃប្រហែល ១០ ពាន់លានដុល្លារអាមេរិក ដែលអាចរកបានសម្រាប់លក់ បន្ទាប់ពីកិច្ចព្រមព្រៀងដែលបានចុះហត្ថលេខាជាមួយរុស្ស៊ីដើម្បីបើកការផ្គត់ផ្គង់ ហើយនឹងមានឱកាសលក់ការប្រមូលផលបច្ចុប្បន្នផងដែរ។ លោក​បាន​និយាយ​នៅ​ក្នុង​សុន្ទរកថា​កាលពី​យប់​មិញ​ថា​៖ «​នេះ​ជា​សញ្ញា​មួយ​ទៀត​ដែល​អ៊ុយក្រែន​អាច​ទប់ទល់​នឹង​សង្គ្រាម​បាន​។»

រុស្ស៊ី និងអ៊ុយក្រែន បានចុះហត្ថលេខាលើកិច្ចព្រមព្រៀងដ៏សំខាន់មួយកាលពីថ្ងៃសុក្រ ដើម្បីបើកកំពង់ផែសមុទ្រខ្មៅរបស់អ៊ុយក្រែនឡើងវិញ សម្រាប់ការនាំចេញគ្រាប់ធញ្ញជាតិ ដោយបង្កើនក្តីសង្ឃឹមថា វិបត្តិស្បៀងអាហារអន្តរជាតិកាន់តែធ្ងន់ធ្ងរដោយការឈ្លានពានរបស់រុស្ស៊ីអាចត្រូវបានបន្ធូរបន្ថយ។ លោក Zelenskyy បាននិយាយថា៖«ប្រហែល ២០ លានតោន នៃការប្រមូលផលគ្រាប់ធញ្ញជាតិកាលពីឆ្នាំមុននឹងត្រូវបាននាំចេញ។ វាក៏នឹងមានឱកាសលក់ការប្រមូលផលនៅឆ្នាំនេះផងដែរ … នៅពេលនេះយើងមានធញ្ញជាតិដែលមានតម្លៃប្រហែល ១០ ពាន់លានដុល្លារ»។

លោកបាននិយាយថា កិច្ចព្រមព្រៀងដែលសម្របសម្រួលដោយអង្គការសហប្រជាជាតិ និងទួរគី គឺជាឱកាសមួយដើម្បីការពារមហន្តរាយស្បៀងអាហារពិភពលោក ដែលអាចបង្កឱ្យមានភាពចលាចលនៅក្នុងប្រទេសជាច្រើន។ លោក Zelenskyy បាននិយាយថា៖«ភាគីប្រទេសរុស្ស៊ី ប្រហែលជាមានការប៉ុនប៉ងធ្វើឱ្យខូចដល់កិច្ចខិតខំប្រឹងប្រែងរបស់អ៊ុយក្រែន និងអន្តរជាតិ។ ​ប៉ុន្តែ​យើង​ជឿជាក់​លើ​អង្គការសហប្រជាជាតិ​»​៕

អត្ថបទ៖ លីដា
ប្រភព៖ Channel News Asia