មន្ត្រីហ្វីលីពីនបានរាយការណ៍នៅថ្ងៃសុក្រនេះថា ខ្លួនបានរកឃើញករណីដំបូងនៃជំងឺអុតស្វា monkeypox នៅលើអ្នកជំងឺម្នាក់ ដែលមានប្រវត្តិធ្វើដំណើរទៅក្រៅប្រទេស នេះបើតាមការចុះផ្សាយរបស់សារព័ត៌មានរ៉យទ័រ។ ការ​ប្រកាស​នេះបាន​ធ្វើ​ឡើងត្រឹមមួយ​សប្តាហ៍ ក្រោយ​អង្គការ​សុខភាព​ពិភពលោក (WHO)​ បាន​ប្រកាស​ថា ការ​ផ្ទុះឡើងនៃ​ជំងឺ​អុតស្វានេះ គឺជា​គ្រាអាសន្ន​ផ្នែក​សុខភាព​របស់ពិភពលោក។ អ្នកជំងឺម្នាក់នោះមិនត្រូវបានគេបញ្ជេញព័ត៌មានផ្ទាល់ខ្លួននោះទេ ដោយត្រឹមតែដឹងថា គាត់មានអាយុ ៣១ឆ្នាំ និងបានធ្វើតេស្តវិជ្ជមានកាលពីថ្ងៃព្រហស្បតិ៍ បន្ទាប់ពីការធ្វើតេស្ត RT-PCR ។

លោក Beverly Ho អនុរដ្ឋលេខាធិការស្តីទីនៃនាយកដ្ឋានសុខាភិបាលហ្វីលីពីនបាននិយាយថា៖«អ្នកជំងឺបានធ្វើដំណើរទៅកាន់ប្រទេស ដែលមានការកត់ត្រាពាក់ព័ន្ធនឹងករណីជំងឺអុតស្វា monkeypox។ អ្នកមានទំនាក់ទំនងជិតស្និទ្ធចំនួន ១០ នាក់ ត្រូវបានកត់ត្រា ដែលក្នុងនោះមាន ៣នាក់ មកពីគ្រួសារតែមួយ។ អ្នកទាំងអស់ត្រូវបានណែនាំឱ្យនៅដាច់ដោយឡែក និងកំពុងត្រូវបានត្រួតពិនិត្យដោយនាយកដ្ឋាន»។

ការកើនឡើង​នៃ​ការឆ្លង​ជំងឺ​អុតស្វា ​ត្រូវបាន​រាយការណ៍​ចាប់តាំងពី​ខែឧសភា នៅខាងក្រៅ​បណ្តា​ប្រទេស​នៅ​អាហ្វ្រិក​ខាងលិច និង​កណ្តាល ដែល​ជំងឺ​នេះ​មានវត្តមានជាយូរមកហើយ​។ ប្រធានអង្គការសុខភាពពិភពលោក Tedros Adhanom Ghebreyesus បាននិយាយកាលពីថ្ងៃពុធថា ករណីជាង ១៨,០០០ ករណី ត្រូវបានរាយការណ៍ទៅ WHO មកពីប្រទេសចំនួន ៧៨ ដោយ ៧០% នៃករណីទាំងអស់ គឺត្រូវបានរកឃើញនៅអឺរ៉ុប និង ២៥% នៅអាមេរិក។ គាត់បាននិយាយថា ការស្លាប់ចំនួន ៥ ត្រូវបានរាយការណ៍ចាប់តាំងពីខែឧសភារៀងមក៕

អត្ថបទ៖ លីដា
ប្រភព៖ រ៉យទ័រ