ប្រទេសចិនបានបញ្ចប់ការធ្វើសមយុទ្ធយោធារយៈពេល ៤ថ្ងៃ ជុំវិញកោះតៃវ៉ាន់ ហើយបានស្នើថា ពួកគេមានគោលបំណងពិនិត្យមើលពីរបៀបផ្លាស់ទី ប្រសិនបើខ្លួនសម្រេចចិត្តបង្រួបបង្រួមជាមួយតៃវ៉ាន់ដោយប្រើប្រាស់យោធា។ យោធាចិនបានធ្វើសមយុទ្ធទ្រង់ទ្រាយធំនៅក្នុងតំបន់ដែនសមុទ្រ និងដែនអាកាសចំនួន ៦ទីតាំង ដែលឡោមព័ទ្ធកោះតៃវ៉ាន់ចាប់ពីថ្ងៃព្រហស្បតិ៍ ដល់ថ្ងៃអាទិត្យ។ ទង្វើ​នេះ​ គឺ​ជា​ការ​ឆ្លើយ​តប​ទៅ​នឹង​ដំណើរ​ទស្សនកិច្ច​របស់​ប្រធាន​សភា​អាមេរិកលោកស្រី Nancy Pelosi នៅ​តៃវ៉ាន់។ បញ្ជាការនៅសមុទ្រចិនខាងកើត ក៏បានបញ្ចេញវីដេអូដែលបង្ហាញពីយន្តហោះចម្បាំង និងយន្តហោះទម្លាក់គ្រាប់បែក មកពីសមយុទ្ធប្រយុទ្ធកាលពីថ្ងៃអាទិត្យ ដែលវាគឺផ្តោតលើការវាយប្រហារនៅលើដី និងការធ្វើតេស្តសមត្ថភាពវាយប្រហារចម្ងាយឆ្ងាយនៅលើអាកាស។

លោក Meng Xiangqing សាស្ត្រាចារ្យនៅសាកលវិទ្យាល័យការពារជាតិបានប្រាប់ទូរទស្សន៍រដ្ឋចិនថា សមយុទ្ធនេះត្រូវបានធ្វើឡើងនៅកៀកនឹងកោះតៃវ៉ាន់ ដែលមិនធ្លាប់មានពីមុននោះឡើយ។ លោកបាននិយាយថា យោធាចិនបានបញ្ជាក់ពីសមត្ថភាពរបស់ខ្លួនក្នុងការឡោមព័ទ្ធតៃវ៉ាន់ និងរារាំងកងកម្លាំងបរទេសមិនឱ្យចូលក្នុងតំបន់នោះបានឡើយ។ លោក​បាន​និយាយ​ថា សមយុទ្ធ​នេះ​បាន​បង្កើត​លក្ខខណ្ឌ​ល្អ និង​អត្ថប្រយោជន៍​ជា​យុទ្ធសាស្ត្រ​ សម្រាប់​ការ​បង្រួបបង្រួម​របស់​ចិន​ជាមួយ​តៃវ៉ាន់។ យន្តហោះ និង​កប៉ាល់​មួយចំនួន​ក្នុង​សមយុទ្ធ​ បាន​ឆ្លង​កាត់​ខ្សែបន្ទាត់​មធ្យម ដែល​ជា​ការរារាំង​មិន​ផ្លូវការ​ ដើម្បី​ជួយ​ការពារ​ការប៉ះទង្គិច​ដោយ​ចៃដន្យ​រវាង​កងកម្លាំង​ចិន និង​តៃវ៉ាន់។ ថ្មីៗ​នេះ អាជ្ញាធរ​ចិន​បាន​ចាប់ផ្តើម​អះអាង​ថា ពួកគេ​មិន​ទទួល​ស្គាល់​ខ្សែបន្ទាត់​នេះ​ទេ  ខណៈ​ពួកគេ​កំពុង​បង្កើន​សម្ពាធ​លើ​តៃវ៉ាន់៕

អត្ថបទ៖ លីដា
ប្រភព៖ NHK