ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្រ បានបញ្ជូនវិក័យប័ត្រមួយទៅសភា ដើម្បីស្វែងរកការបន្តច្បាប់អាជ្ញាសឹក និងរយៈពេលនៃការចល័តទ័ពទូទៅរហូតដល់ខែវិច្ឆិកា ដោយសារទាំង ២ នេះនឹងត្រូវផុតកំណត់នៅថ្ងៃទី២៣ ខែសីហា។ ប្រសិនបើវិក័យប័ត្រត្រូវបានអនុម័ត មានន័យថាបុរសដែលមានអាយុពី១៨ ទៅ ៦០ឆ្នាំ នឹងត្រូវបានហាមឃាត់មិនឱ្យចាកចេញពីប្រទេសបន្ដទៀត។ លោក Zelenskyy បានបោះជំហានថ្មីនេះ នៅពេលដែលយោធាអ៊ុយក្រែនរៀបចំ សម្រាប់ការប្រយុទ្ធរយៈពេលវែងប្រឆាំងនឹងកងកម្លាំងរុស្ស៊ី។

ចំណែកឯក្រសួងការពារជាតិរុស្ស៊ី បាននិយាយកាលពីថ្ងៃសៅរ៍ថា កងកម្លាំងរបស់ខ្លួនបានបំផ្លាញឧបករណ៍បាញ់គ្រាប់រ៉ុក្កែត HIMARS ដែលផ្ដល់ដោយសហរដ្ឋអាមេរិក និងឃ្លាំងផ្ទុកគ្រាប់រំសេវ នៅក្នុងតំបន់ Donetsk ភាគខាងកើតអ៊ុយក្រែន។ កងកម្លាំង​អ៊ុយក្រែនក៏​កំពុង​បង្កើន​ការ​វាយ​ប្រហារ​តបត ​ក្នុង​ការ​ប៉ុនប៉ង​ដណ្តើម​យក​តំបន់ Kherson ភាគ​ខាង​ត្បូងឡើងវិញ។ មន្ត្រីយោធាជាន់ខ្ពស់អ៊ុយក្រែនម្នាក់ តាមសេចក្តីរាយការណ៍បាននិយាយថា កងកម្លាំងរបស់ប្រទេសខ្លួន មានសមត្ថភាពវាយប្រហារស្ទើរតែគ្រប់ផ្លូវផ្គត់ផ្គង់របស់រុស្ស៊ីនៅភាគខាងត្បូង៕

អត្ថបទ៖ លីដា
ប្រភព៖ NHK