អគ្គលេខាធិការអង្គការសហប្រជាជាតិលោក Guterres បានមកដល់អ៊ុយក្រែន ដើម្បីពិភាក្សាជាមួយលោក Zelenskyy និងលោក Erdogan
អគ្គលេខាធិការអង្គការសហប្រជាជាតិលោក Antonio Guterres កំពុងស្ថិតនៅក្នុងប្រទេសអ៊ុយក្រែន ដើម្បីពិភាក្សាជាមួយប្រធានាធិបតីលោក Volodymyr Zelenskyy និងប្រធានាធិបតីទួរគីលោក Recep Tayyip Erdogan ។ លោក Guterres បានមកដល់ទីក្រុង Lviv ភាគខាងលិចប្រទេសអ៊ុយក្រែន កាលពីថ្ងៃពុធ ហើយនឹងជួបជាមួយលោក Zelenskyy និងលោក Erdogan នៅថ្ងៃព្រហស្បតិ៍នេះ។ ពួកគេនឹងផ្លាស់ប្តូរទស្សនៈស្តីពីការនាំចេញផលិតផលកសិកម្ម ដែលយល់ព្រមដោយរុស្ស៊ី និងអ៊ុយក្រែន និងសម្របសម្រួលដោយទួរគី និងអង្គការសហប្រជាជាតិ។
គាត់ក៏គ្រោងនឹងមានការប្រជុំដាច់ដោយឡែកជាមួយលោក Zelenskyy ផងដែរ ហើយអ្នកទាំង ២ ត្រូវបានគេរំពឹងថា នឹងពិភាក្សាអំពីអ្វីដែលអាចធ្វើបាន ដើម្បីកាត់បន្ថយភាពតានតឹងរវាងអ៊ុយក្រែន និងរុស្ស៊ី។ ភាពតានតឹងរវាងភាគីទាំង ២ បាននិងកំពុងកើនឡើងនៅឧបទ្វីបគ្រីមៀ ដែលរុស្ស៊ីបានបញ្ចូលឧបទ្វីបនេះក្នុងឆ្នាំ២០១៤ បន្ទាប់ពីមានការផ្ទុះនៅឃ្លាំងអាវុធចំនួន ២ នៅថ្ងៃទី០៩ និងទី១៦ ខែសីហា។ ក្រសួងការពារជាតិរុស្ស៊ីបានហៅការផ្ទុះនៅថ្ងៃទី១៦ ថាជាអំពើបំផ្លិចបំផ្លាញ ខណៈអាជ្ញាធរក្នុងតំបន់កាលពីថ្ងៃពុធបានបង្ហាញថា អគារផ្ទះល្វែងចំនួន ៩ នៅក្បែរនោះ និងផ្ទះប្រហែល ៧០ខ្នង បានរងការខូចខាត៕
អត្ថបទ៖ លីដា
ប្រភព៖ NHK