ប្រធានាធិបតីឥណ្ឌូណេស៊ីលោក ចូកូ វីដូដូ បាននិយាយថា មេដឹកនាំប្រទេសចិនលោក ស៊ី ជីនពីង  និងមេដឹកនាំប្រទេសរុស្ស៊ីលោក វ្ល៉ាឌីមៀ ពូទីន មានគម្រោងនឹងមកចូលរួមកិច្ចប្រជុំកំពូល G20 នៅកោះបាលី ក្នុងខែវិច្ឆិកា។ លោក វីដូដូ បានប្រាប់ទៅ Bloomberg News ក្នុងបទសម្ភាសន៍មួយថា៖«លោក ស៊ី ជីនពីង នឹងមកចូលរួម។ ប្រធានាធិបតី ពូទីន ក៏បានប្រាប់ខ្ញុំថា គាត់នឹងមកផងដែរ»។ នេះ​ជាការ​បញ្ជាក់​លើកដំបូង​ ដែល​មេដឹកនាំ​ទាំង ២ ​នឹង​ចូលរួម​កិច្ចប្រជុំ​កំពូល​ G20 ហើយវានឹងក្លាយជាកិច្ចប្រជុំកំពូលពិភពលោកលើកដំបូង ចាប់តាំងពីការឈ្លានពានរបស់រុស្ស៊ីលើអ៊ុយក្រែន និងភាពតានតឹងកាន់តែខ្លាំងឡើងលើកោះតៃវ៉ាន់។

វាក៏ជាលើកទី១ផងដែរ ដែលលោក ស៉ី បានចាកចេញពីប្រទេសចិន ចាប់តាំងពីខែមករា ឆ្នាំ ២០២០ នៅពេលដែលប្រទេសចិន បានបិទព្រំដែនរបស់ខ្លួននៅពេលចាប់ផ្តើមនៃជំងឺរាតត្បាត COVID-19 ។ ចាប់តាំងពីពេលនោះមកលោក ស៊ី ជីនពីង គ្រាន់តែបានចាកចេញពីចិនដីគោក ដើម្បីប្រារព្ធខួបលើកទី២៥ នៃការប្រគល់ហុងកុងទៅកាន់ប្រទេសចិននៅថ្ងៃទី០១ ខែកក្កដាឆ្នាំនេះប៉ុណ្ណោះ។ កិច្ចប្រជុំកំពូលនៅខែវិច្ឆិកា នឹងក្លាយជាប្រធានបទសំខាន់ ដោយសារប្រធានាធិបតីអាមេរិកលោក ចូ បៃដិន ត្រូវបានគេរំពឹងថា នឹងមកចូលរួមផងដែរ ប៉ុន្តែវាមិនច្បាស់ទេថា តើគាត់នឹងជួបជាមួយលោក ពូទីន ដែរ ឬទេ។ ប៉ុន្តែ​របាយការណ៍​បាន​បង្ហាញ​ពី​លទ្ធភាព​នៃ​ជំនួប​ទល់មុខ​គ្នា​រវាង​លោក បៃដិន និង​លោក ស៉ី ក្នុងពេល​ឆាប់ៗ​ខាងមុខ​ នៅ​មុន​កិច្ចប្រជុំ​កំពូល ឬ​ក្រោយកិច្ចប្រជុំ៕

អត្ថបទ៖ លីដា
ប្រភព៖ BBC