សិ​ស្សា​នុ​សិស្សនៅ​ប្រទេស​ហ្វីលីពីន​កំពុង​ត្រឡប់​ទៅ​ថ្នាក់​រៀនរបស់ពួកគេឡើងវិញ​ សម្រាប់​ការចូលរៀនដោយផ្ទាល់ជា​លើក​ដំបូង ​បន្ទាប់​ពី​ការ​រឹត​បន្តឹងពាក់ព័ន្ធនឹងជំងឺ COVID-19 ដែលមានរយៈពេល ២ ឆ្នាំ​កន្លះ។ រដ្ឋាភិបាលហ្វីលីពីននៅថ្ងៃចន្ទនេះ បានសម្រេចដកការរឹតត្បិតលើការមកថ្នាក់រៀនដោយផ្ទាល់ សម្រាប់ថ្នាក់បឋមសិក្សា អនុវិទ្យាល័យ និងវិទ្យាល័យ នៅពេលដែលឆ្នាំសិក្សាថ្មីរបស់សិស្សបានចាប់ផ្តើម។ ជាក់ស្ដែង នៅសាលាបឋមសិក្សាសាធារណៈមួយ ដែលមានកូនសិស្សប្រហែល ៨,០០០ នាក់ នៅក្នុងរដ្ឋធានីម៉ានីល ក្មេងៗត្រូវបានគេមើលឃើញថា បានមកដល់សាលារៀនយ៉ាងសប្បាយរីករាយ ដោយមានម្ដាយឪពុកជូនមកសាលារៀន។

សិស្សៗត្រូវបានបែងចែកវេនរៀនជាក្រុម ដើម្បីកាត់បន្ថយហានិភ័យនៃការឆ្លងជំងឺ COVID-19 ដោយក្រុមដំបូងបានមកដល់ថ្នាក់រៀនតាំងតែពីម៉ោង ៥ និង ៣០ នាទីព្រឹក។ សិស្សៗនឹងត្រូវ​ពិនិត្យ​សីតុណ្ហភាព​ និង​ធ្វើ​អនាម័យ​ដៃ​នៅ​ឯច្រកចូល​សាលា​ មុន​ពេល​ពួកគេទៅ​ថ្នាក់រៀនរបស់ពួកគេ។ ទាំងសិ​ស្សា​នុ​សិស្ស អាណាព្យាបាល និងគ្រូបង្រៀន សុទ្ធតែបានបង្ហាញពីការសប្បាយរីករាយ នៅពេលដែលពួកគេបានត្រឡប់មកថ្នាក់រៀនវិញ ដោយសារថា នៅពេលដែលរៀនតាមអនឡាញ អាណាព្យាបាលមានការលំបាកក្នុងការបង្ហាត់កូនៗ ហើយសិស្សៗក៏មិនអាចផ្ចង់អារម្មណ៍រៀនតាមអ៉ីធឺណិត ខណៈគ្រូៗមានការលំបាកក្នុងការពន្យល់បន្ថែម៕

អត្ថបទ៖ លីដា
ប្រភព៖ BBC