ថៃ៖ ករណីរបស់តារាសម្តែងស្រីដ៏ល្បី Pinky Savika Chaiyadej រួមជាមួយនឹងអ្នកម្តាយត្រូវបានជាប់ឃុំ ដោយមិនអាចធានាខ្លួនអោយនៅក្រៅឃុំបាននោះទេ ចំណែកបទល្មើសដែលត្រូវបានចោទប្រកាន់នោះគឺ ផ្តើមចេញពីការបណ្តាក់ទុននៅការទិញដូររូបិយប័ណ្ឌ តាមរយៈ Forex-3D កាលពីថ្ងៃទី១៨ ខែសីហា ដោយជនជាប់ចោទមានទាំងអស់ចំនួន ១៩នាក់ សុទ្ធតែជាក្រុមតារា ជាអ្នកចម្រៀង ជាមនុស្សនៅសង្គមជាន់ខ្ពស់ (High-so) និងបុគ្គលល្បីជាច្រើនទៀតនៅក្នុងសង្គមប្រទេសថៃ។ ចំពោះជនរងគ្រោះមានចំនួនរហូតទៅដល់ ជាង ៩ពាន់នាក់ គិតជាចំនួនទឹកប្រាក់ដែលបានឆបោកនោះមានរហូតដល់ទៅ ជិត ៧០លានដុល្លាអាមេរិក ដោយបានដាក់ពាក្យបណ្តឹងសុំអោយសមត្ថកិច្ចចូលរួមដោះស្រាយផងដែរ។

មកទល់នឹងពេលនេះដែរតារាស្រី Pinky Savika រួមជាមួយនឹងអ្នកម្តាយ កំពុងស្ថិតនៅពន្ធធនាគារនៅឡើយ ចំណែកបណ្តាអ្នកគាំទ្ររបស់ Pinky មានការព្រួយបារម្មណ៏យ៉ាងខ្លាំងចំពោះតារាស្រីរូបនេះ រហូតឈានដល់ចូលទៅ Comments ​ក្នុង Instagram របស់តារាស្រី Yatthip Ratchapal ដែលជាមិត្តជិតស្និទ្ធរបស់ Pinky ព្រមទាំងបានសរសេរថា «ចង់សុំអោយជួយ Pinky ផង» ហើយក៏មាន comments ខ្លះសរសេរដៀមដាមថា «ជាមិត្តភក្តិជិតស្និទ្ធនឹងគ្នា ប៉ុន្តែនៅមិនទាន់ឃើញចេញមកផ្តល់កម្លាំងចិត្តសោះ»។

ថ្មីៗនេះដែរតារាស្រី Yatthip Ratchapal បានបង្ហោះសារមួយចេញមក ជុំវិញបញ្ហានេះ ដោយរៀបរាប់ថា « Yatt​ បាន​ដឹង​ព័ត៌មានដែលបានកើតឡើងដំណាល​​​អ្នក​រាល់​គ្នាតែម្តង ខណៈពេលនេះដែរ Yatt ក៏នៅ​មិន​ទាន់​ដឹង​ថា​ដំណើររឿងនៃក្តីក្តាំងនឹងដើរទៅបែបណានោះទេ នាងក៏បាន​​លើក​ទឹក​ចិត្ត​ដល់​ជន​រង​គ្រោះ ឬ​អ្នក​ដែល​បានរង​ទុក្ខ​ទាំង​អស់​គ្នា​នៅ​ទី​នេះ ហើយក្នុង​នាម​ជា​មិត្ត​ភក្តិ នាងពិតជាកើតទុក្ខ​ខ្លាំង​ណាស់ដែរ ហើយព្យាយាមទាក់ទងទៅកាន់មិត្តភក្តិគ្រប់ពេលតាំងពីថ្ងៃដំបូង ប៉ុន្តែ​នៅ​មិន​អាច​ទាក់​ទង​បាន​រហូត​មក​ដល់​ថ្ងៃ​នេះ។

ខណៈពេលនេះដែរ មិនមានដំណឹងអ្វីឡើយពី Pinky នាងបានត្រឹមតែផ្ញើសារលើកទឹកចិត្ត អោយ «Pinky រឹងមាំឡើង ក្នុងថ្ងៃដែលនាងពិបាកបំផុត» អ្នកនាង Yattip ក៏បានបន្តទៀតថា អ្នកនាងមិនមានហេតុផលអ្វីដែលត្រូវផុសអោយបណ្តាសង្គមបានដឹងនោះទេ ព្រោះអ្នកនាងមិនចង់អោយព័ត៌មានទាំងពិតឬមិនពិត ត្រូវបានចែករំលែកផ្សព្វផ្សាយចេញមកកាន់តែវែងឆ្ងាយនោះទេ ហើយអ្នកនាងក៏បានបញ្ចប់ថា អ្នកដែលគេមិនបានផុសសារចេញតាមបណ្តាសង្គមមិនមែនបានន័យថាគេមិនមានអារម្មណ៍ ឬមិនមានចិត្តមិនស្រឡាញ់មិត្តភក្តិនោះទេ៕

អត្ថបទ៖ Bee
ប្រភព៖thairath