អ្នកចាំទីប្រេស៊ីលម្នាក់បានភ្លាត់ស្នៀតទាត់បញ្ជូលទីខ្លួនឯង ដោយសារគាត់បានច្រឡំមាត់ហៅឈ្មោះសង្សារខុស នៅពេលដែលអ្នកសម្ភាសបានសួរគាត់ថា តើមានអ្វីផ្ដាំផ្ញើទៅកាន់មិត្តស្រីរបស់គាត់ ឬទេ ក្រោយបញ្ចប់ការប្រកួតមួយក្នុងលទ្ធផល ១ ទល់ ១។ អ្នកចាំទីម្នាក់នោះមានឈ្មោះថា Kainan ជាកីឡាកររបស់ក្លឹប GR Esperança មកពីប្រទេសប្រេស៊ីល ហើយក្នុងការប្រកួតនោះផងដែរ គាត់បានជាប់ជា «កីឡាករល្អបំផុតនៃការប្រកួត» ទល់នឹងក្លឹប Vic Vic សម្រាប់ក្របខណ្ខ Copa da Paz ។

អ្នកសម្ភាស​នៅ​កណ្តាល​ទីលាន ក្រោយចប់ការប្រកួតបានសួរ​ថា​៖ «​តើចង់​ផ្ញើ​ការឱប ឬ​ថើប ទៅ​អ្នក​ណាទេ?» កីឡារករលោក Kainan ក៏ឆ្លើយថា៖«ផ្ញើចំពោះមិត្តស្រីរបស់ខ្ញុំ ដែលកំពុងធ្វើការឥឡូវនេះ សូមអរព្រះគុណព្រះជាម្ចាស់ បើមិនដូច្នេះទេ ខ្ញុំនឹងមិននៅទីនេះទេ។ អូន Grazi បងសូមឱបអូនពីចម្ងាយ»។ ប៉ុន្តែ ការពិតទៅ Grazi មិនមែនជាឈ្មោះរបស់មិត្តស្រីបច្ចុប្បន្នរបស់គាត់ទេ។

ភ្លាមៗនោះ លោក Kainan បានភ្ញាក់ដឹងកំហុសរបស់គាត់ ដោយនិយាយថា៖«ខ្ញុំនិយាយឈ្មោះខុស។ នាងគឺឈ្មោះ Jucielly ខ្ញុំបានហៅឈ្មោះសង្សារខុសហើយ»។ អ្នកសម្ភាសក៏បានសួរបន្ដថា៖«អ្នកនិយាយលេងមែនទេ?» ហើយលោក Kainan បាននិយាយថា៖«ខ្ញុំធ្ងន់-ក ហើយពេលនេះ។ ខ្ញុំច្បាស់ជាត្រូវមានរឿងដោះស្រាយពេលទៅដល់ផ្ទះមិនខាន»។ យ៉ាងណាក៏ដោយ មកទល់ពេលនេះ គេនៅមិនទាន់ដឹងថា លោក Kainan អាចរក្សាទំនាក់ទំនងជាមួយនាង Jucielly ឬទេ៕

អត្ថបទ៖ លីដា
ប្រភព៖ The Nation Thailand