នាយកដ្ឋានគ្រប់គ្រងជំងឺរបស់ប្រទេសថៃ (DDC) បានប្រកាសថា ខ្លួនកំពុងតាមដានយ៉ាងដិតដល់ចំពោះស្ថានភាព «ជំងឺគ្រុនផ្តាសាយប៉េងប៉ោះ» បន្ទាប់ពីមានរបាយការណ៍ថា មានករណីប្រមាណជា ១០០ បានលេចឡើងនៅក្នុងប្រទេសឥណ្ឌា។ លោកវេជ្ជបណ្ឌិត Opas Karnkawinpong អគ្គនាយករបស់ DDC បានប្រកាសថា មិនមានករណីណាមួយត្រូវបានបញ្ជាក់នៅក្នុងប្រទេសថៃនោះទេ បន្ទាប់ពីមានការផ្ទុះឡើងនៅក្នុងស្រុក Kollam នៃរដ្ឋ Kerala របស់ប្រទេសឥណ្ឌា កាលពីថ្ងៃទី០៦ ខែឧសភា ចំពោះកុមារអាយុក្រោម ៥ឆ្នាំ។ គិត​ត្រឹម​ថ្ងៃ​ម្សិលមិញនេះ មាន​ករណី​ប្រមាណ ១០០​ ត្រូវ​បាន​គេ​រាយការណ៍នៅឥណ្ឌា ប៉ុន្តែ​មិន​មាន​អ្នក​ស្លាប់​ទេ។

ជម្រាបដែរថា កុមារដែលមានអាយុក្រោម ៥ឆ្នាំ ងាយនឹងកើតជំងឺនេះណាស់ ពីព្រោះមេរោគងាយឆ្លងតាមរយៈការប៉ះ ដូចជាការប៉ះអ្វីមិនស្អាត ឬលេងអ្វីចូលក្នុងមាត់។ រោគ​សញ្ញា​ដំបូង​មាន​ដូច​ជា៖ ​គ្រុន​ផ្ដាសាយ ក្តៅ​ខ្លួន ឈឺ​ចុក​ចាប់ ហើយ​ក្រោយ​មក​មាន​កន្ទួល។ ជំងឺនេះមិនទាក់ទងនឹងការបរិភោគប៉េងប៉ោះនោះទេ គ្រាន់តែថា កន្ទួល​នេះ​លេច​ចេញ​ជា​ក្រហម និង​មាន​ពងបែក​ដូច​ផ្លែ​ប៉េងប៉ោះ។ វាត្រូវបានសន្មត់ថា លក្ខណៈរោគរាតត្បាតក្នុងតំបន់ និងរោគសញ្ញារបស់វា ក៏ស្រដៀងនឹងជំងឺដែលកើតមានជាទូទៅចំពោះកុមារ។ លោកវេជ្ជបណ្ឌិត Opas បានបន្ថែមថា ជំងឺគ្រុនផ្តាសាយប៉េងប៉ោះមិនមែនជាជំងឺឆ្លងថ្មីនោះទេ ហើយវារីករាយដាលក្នុងកម្រិតកំណត់ប៉ុណ្ណោះ។ ការតាមដានរោគសញ្ញាឱ្យបានត្រឹមត្រូវ និងមានអនាម័យល្អចំពោះកុមារតូចៗ គឺចាំបាច់បំផុត៕

អត្ថបទ៖ លីដា
ប្រភព៖ The Standard