យោងតាមការចុះផ្សាយដោយ Yahoo News បានឱ្យដឹងថា វិទ្យាស្ថានសាកលវិទ្យាល័យមួយក្នុងទីក្រុង Kyiv បាននិយាយថា ការខូចខាតសរុបដែលបង្កឡើងដោយរុស្ស៊ីចំពោះហេដ្ឋារចនាសម្ព័ន្ធរបស់អ៊ុយក្រែន ត្រូវបានប៉ាន់ប្រមាណថាមានចំនួន ១៤៣.៨ ពាន់លានដុល្លារ គិតត្រឹមខែកុម្ភៈ មួយឆ្នាំបន្ទាប់ពីការលុកលុយរបស់រុស្ស៊ីមកលើប្រទេសខ្លួន។ វិទ្យាស្ថានមួយនៅសាលាសេដ្ឋកិច្ច Kyiv បានចេញផ្សាយរបាយការណ៍កាលពីថ្ងៃពុធសប្តាហ៍មុន។

វិទ្យាស្ថាននិយាយថា ចំនួននៃការខូចខាតដ៏ធំបំផុតគឺពីការបំផ្លិចបំផ្លាញដល់លំនៅដ្ឋាន ដែលបានប៉ាន់ស្មានថា មានចំនួន ៥៣.៦ ពាន់លានដុល្លារ។ អគារលំនៅដ្ឋានជាង ១៥០,០០០ ត្រូវបានខូចខាត ឬបំផ្លាញ។ ចំនួន​នៃ​ការ​ខូច​ខាត​ផ្លូវ​ថ្នល់ និង​ស្ពាន​ គឺ​ធំ​ជាង​គេ​ទី​ពីរ​គឺមានតម្លៃ ៣៦.២ ​ពាន់​លាន​ដុល្លារ។ ចំណែកផ្លូវរដ្ឋ និងក្នុងស្រុកជាង ២៥,០០០ គីឡូម៉ែត្រ ព្រមទាំងស្ពាន និងផ្លូវឆ្លងកាត់ចំនួន ៣៤៤ ត្រូវបានបំផ្លាញ ឬខូចខាត៕

អត្ថបទ៖ លីដា
ប្រភព៖ Yahoo News