ប្រធានាធិបតីអ៊ុយក្រែន Volodymyr Zelenskyy បានអំពាវនាវឱ្យអង្គការអន្តរជាតិជួយជាបន្ទាន់ ដល់ប្រជាជនដែលរងផលប៉ះពាល់ដោយទឹកជំនន់ដ៏ធំ ដែលបណ្តាលមកពីការបាក់ទំនប់នៅភាគខាងត្បូងអ៊ុយក្រែន។ នៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃពុធ លោក Zelenskyy បាននិយាយថា មនុស្សជាង ២,០០០ នាក់ ត្រូវបានជួយសង្គ្រោះដោយយោធា និងសេវាកម្មពិសេសរបស់ប្រទេសអ៊ុយក្រែន។ ប៉ុន្តែ​លោក​បាន​និយាយ​ថា ស្ថានភាព​នៅ​ក្នុង​តំបន់ Kherson ដែល​កាន់កាប់​ដោយ​រុស្ស៊ី​គឺរងគ្រោះមហន្តរាយ​យ៉ាង​ខ្លាំង។

គាត់បានរិះគន់រុស្ស៊ីចំពោះការបោះបង់ចោលមនុស្សនៅទីនោះក្នុង «លក្ខខណ្ឌដ៏គួរឱ្យភ័យខ្លាច» ដោយបន្ថែមថា វានៅ​មិន​អាច​កំណត់​បាន​ថា ​តើ​មនុស្ស​ប៉ុន្មាន​នាក់​ក្នុង​ទឹកដី​ដែល​រុស្ស៊ីបានកាន់កាប់មួយនោះ​ អាច​នឹង​ស្លាប់​ដោយ​គ្មាន​ការ​ជួយ​សង្គ្រោះ ទឹក​ស្អាត អាហារ និង​ការ​ថែទាំ​វេជ្ជសាស្ត្រ។ លោក Zelenskyy បាននិយាយថា កិច្ចខិតខំប្រឹងប្រែងទ្រង់ទ្រាយធំគឺចាំបាច់។ លោកបាននិយាយថា អង្គការអន្តរជាតិ ដូចជាគណៈកម្មាធិការអន្តរជាតិនៃកាកបាទក្រហម ចាំបាច់ត្រូវចូលរួមជាបន្ទាន់នូវប្រតិបត្តិការជួយសង្គ្រោះ និងជួយប្រជាជននៅក្នុងតំបន់ដែលកាន់កាប់នៅតំបន់ Kherson៕

អត្ថបទ៖ លីដា
ប្រភព៖ NHK