ប៉ូលីសបាននិយាយថា មនុស្សជាង ៨០នាក់ បានរងរបួសនៅក្នុងគ្រោះថ្នាក់ចរាចរណ៍មួយ បន្ទាប់ពីរថយន្តចំនួន ៧គ្រឿង រួមទាំងឡានក្រុងចំនួន ៣ ដែលដឹកសិស្សសាលាមធ្យមសិក្សា បានបុកបន្ដកន្ទុយគ្នានៅលើផ្លូវក្នុងស្រុកមួយ ក្នុងខេត្ត Gangwon ភាគឦសាននៅថ្ងៃសុក្រនេះផ្ទាល់ កាលពី​ម៉ោង​ ១​និង​២៦​នាទី​រសៀល (ម៉ោងក្នុងស្រុក)​។ ហេតុការណ៍បានកើតឡើងនៅលើផ្លូវជាតិលេ៤៤ ក្នុងទីក្រុង Hongcheon ប្រហែល ១០០ គីឡូម៉ែត្រភាគខាងកើតទីក្រុងសេអ៊ូល។

ប៉ូលិស និង​មន្ត្រី​សង្គ្រោះ​បន្ទាន់​បាន​និយាយ​ថា គ្រោះថ្នាក់នេះ​បាន​បណ្តាល​ឱ្យមនុស្ស​ ៣នាក់​រង​របួស​ធ្ងន់ និង ៧៩ នាក់​ផ្សេង​ទៀត​រង​របួស​ស្រាល។ ឡានក្រុងទាំង ៣ ត្រូវបានគេរាយការណ៍ថា បានដឹកសិស្ស និងគ្រូបង្រៀនមកពីសាលាមធ្យមមួយក្នុងទីក្រុងសេអ៊ូល ដែលកំពុងធ្វើដំណើរទៅដើរលេង ដែលនាំឱ្យមនុស្ស ៧៩ នាក់ នៅលើឡានក្រុងទាំងនោះរងរបួស។ អ្នកពន្លត់អគ្គីភ័យប្រហែល ៣០ នាក់ កំពុងចូលរួមក្នុងប្រតិបត្តិការជួយសង្គ្រោះ ខណៈដែលប៉ូលីសកំពុងស៊ើបអង្កេតមូលហេតុនៃគ្រោះថ្នាក់នេះ៕

អត្ថបទ៖ លីដា
ប្រភព៖ យ៉ុងហាប់