លោក Jim Ratcliffe នៅតែមានចំនាប់អារម្មណ៍ក្នុងការទិញក្លឹបយក្សនៅអង់គ្លេស Chelsea ប៉ុន្តែកំពុងទាក់គាំងនៅពេលដែល លោកម្ចាស់ក្លឹបតោខៀវដាក់លក់ក្នុងតំលៃ ៤.៧ពាន់លានដុល្លារសហរដ្ឋអាមេរិច។ តាមពិតទៅលោកបានទាក់ទងជាមួយនឹងការចង់បានក្លឹបនេះតាំងពីឆ្នាំមុនមកម្ល៉េះ ហើយលោកគឺជាមហាសេដ្ឋីប្រេង ដែលមានទ្រព្យសម្បត្តិមហាសាលចំនួន ៣៩ពាន់លានដុល្លារសហរដ្ឋអាមេរិច ខណៈដែលគាត់ចង់វិនិយោគជាមួយក្លឹបបាលទាត់មួយនេះ។ មិនតែប៉ុណ្ណោះលោក Ratcliffe បានត្រៀមខ្លួនរួចរាល់ក្នុងការចំណាយប្រហែល ៦៥.៥លានដុល្លារសហរដ្ឋអាមេរិចលើការចំណាយប្រចាំឆ្នាំរបស់ក្លឹប។ ហើយការសម្រេចចិត្តទិញក្លឹប Chelseaនេះ និងប្តូរឈ្មោះប្រេនតាមក្រុមហ៊ុនរបស់លោក Ratcliffe នេះបើយោងទៅតាមកាសែត The Times។ ទោះបីជាយ៉ាងណាក៏ដោយលុយកាក់មិនមែនជាបញ្ហាសំរាប់សេដ្ឋីប្រាក់លានដែលមានអាយុ ៦៦ឆ្នាំនេះឡើយ ប៉ុន្តែលោក Ratcliffe មិនទាន់បានរៀបចំរួចរាល់ក្នុងការចំនាយទៅលើអ្វីដែលលោក Abramovich ចង់បាន។

យ៉ាងណាក្តី ក្លឹបតោខៀវ Chelsea បាននិយាយជាផ្លូវការថា ក្លឹបមិនមែនសំរាប់លក់នោះទេ ប៉ុន្តែមហាសេដ្ឋីជនជាតិរុស្សីហាក់ដូចជាមិនសូវរវីរវល់ជាមួយក្លឹបក្នុងរយៈពេលប៉ុន្មានខែចុងក្រោយនេះ ហើយមិនសូវបានទៅចូលរួមទស្សនាការប្រកួតរបស់ក្រុមប៉ុន្មានទេនៅក្នុងរដូវកាលនេះ ខណៈដែលគាត់កំពុងតែមានបញ្ហាជាមួយទិដ្ឋាការដោយសារបញ្ហាកាទូតរវាងទីក្រុងឡុង និងក្រុងមូស្គូ។ ហើយនៅពេលនេះ លោកម្ចាស់ក្លឹបតោខៀវ Chelsea កំពុងរស់នៅប្រទេសអុីស្រាអែល និងកំពុងមានគំរោងចំនាយរហូតដល់ ១.៨ពាន់លានដុល្លារដើម្បីរៀបចំ Stamford Bridge ឡើងវិញ។ ដោយសារតែការចង់បានពហុកីឡាដ្ឋានដែលទំនើប បូកជាមួយនិងភាពសាំញុំ និងការចំណាយទៅលើការជួសជុលឡើងវិញដែលកំពុងតែធ្វើ បានធ្វើអោយលោក Ratcliffe ស្ទាក់ស្ទើរ និងមិនចង់ជួបនូវបញ្ហាទាំងអស់នេះ។ យ៉ាងណាក៏ដោយ ការចរចារក្នុងការទិញយកក្លឹបយក្ស Chelsea នេះមិនទាន់បានសម្រេចនៅឡើយទេ។ លោក Ratcliffe​ គឺបានកើតនៅក្នុងទីក្រុង Manchester និងធំដឹងក្តីជាអ្នកគាំទ្រក្រុមបិសាចក្រហម Manchester United ហើយរូបគាត់ក៏ជាអ្នកវិនិយោគលើក្រុមកីឡាផងដែរ។ កាលពីឆ្នាំមុនគាត់បានចំនាយ ២០៦លានដុល្លារលើក្រុម Ineos និងបានទិញក្លឹប FC Lausanne-Sport នៅប្រទេសស្វីសកាលពីខែវិច្ឆិកាឆ្នាំ ២០១៧ផងដែរ៕

អត្ថបទ៖សុគុណា
ប្រភព៖ Foxsports